Дзæуджыхъæуы ацыдысты æрвылазон ерыстæ дзюдойæ. Ацы хатт фыццаг бынат бацахсыныл тох кодтой 280 архайæджы бæстæйы алы регионтæй. Алчидæр архайдта йæ тыхтæ æххæстæй равдисыныл. Куыд сын бантыст, уымæн аргъ скодтой дæсны тæрхонгæнджытæ.
Ныхмæлæууæгыл фæтых уæвынæн дæ хъару æмæ фæлтæрддзинад æххæстæй хъуамæ равдисай. Тренертæ тыхсынц, архайынц фæсивæдæн баххуыс кæныныл, уынаффæтæ сын кæнынц, фæлæ уæддæр алчидæр архайы, æрмæст йæхи удыхъæд æвдисæг амæлттæй пайдагæнгæйæ. Хъыргъаты Сабинæ иу тохы фæхæрд, иуы та фæуæлахиз. «Алы фезмæлд дæр — хъуыдыгæнгæйæ. Уæдæ, татамимæ рахизгæйæ, мæсты кæнæн дæр нæй», – зæгъы чызг.
Дзюдойæ ерыстæ Дзæуджыхъæуы саразынц æрвылаз. Ацы хатт фыццаг бынат бацахсыныл тох кодтой, 14-æй 16 азы онг кæуыл цæуы, ахæм 280 лæппу æмæ чызджы. Дзæуджыхъæумæ æрбамбырд сты спортсментæ Цæгат æмæ Хуссар Ирыстон, Стъарапол, Цæцæн, Мæхъæл, Дагестан, Мæскуы æмæ Кæсæг-Балхъарæй.
Лæппутæ тох кодтой 10, чызджытæ та 8 уæзмæ гæстæ. Цæмæй спортсментæн уæлахизыл ерыс кæнгæйæ иухуызон уавæртæ уа, уымæ та сæ цæст дардтой тæрхонгæнджытæ.
Ам йæхи хуыздæр чи равдиса, уыцы дзюдоисттæ дарддæр тох кæндзысты бæстæйы æмвæзадыл ерыстæм æвзарæн къæпхæнты. Мадзаларазджытæ – Дзæуджыхъæуы администрацийы фæсивæдон политикæ, физкультурæ æмæ спорты комитет Дзюдойы федерациимæ иумæ.
Ацы аз ерыстæй ссардтой республикæйы Дзюдойы федерацийы фыццаг президент Æлбегонты Хасаны ном. Бирæ азты уыд боксы федерацийы президент дæр. Йæ царды сæйраг проекттæй иу сси футболон клуб «Автодор», уым спорты бæрзæндтæм фыццаг къахдзæфтæ бирæ футболисттæ акодтой. Ерысты архайджытæн раарфæ кодтой республикæйы министрадты æмæ ведомствоты разамонджытæ. Æлбегонты Хасан дзюдойы райрæзтмæ цы æвæрæн бахаста, уый тыххæй фæсивæдæн радзырдта Перламенты сæрдар Тускъаты Таймураз.
Дзюдоисттæ сæхи тæлтæг æмæ цæхæрзæрдæйæ равдыстой. Разæй сæм æнхъæлмæ кæсынц ног ерыстæ, ацæудзысты сæрды Назраны.
Дзæдзойты Фатимæ
