Дзуццаты Фатимæ ам арæх вæййы. Йæхæдæг дохтыр-инфекционист у. 44 азы фæкуыста Боткины рынчындоны. Уый фæстæ нæхимæ æрыздæхт. Дзæуджыхъæуы реабилитацийы центр ис, уый куы базыдта, уæд сфæнд кодта йе ‘нæниздзинад фæхуыздæр кæнын.
Ацæргæ æмæ æнæкуыстхъом адæймæгты реабилитацийы центры дзæбæх кæнынц рагъыстæджы хъæндзинæдтимæ пациентты, суанг 1996 азæй. Официалон æгъдауæй та йæ байгом кодтой 2012 азы. Ифтонггæрзтæй срæвдз сабыргай. Ныр бæстыхайы пандусæй лифты онг хъæугæ æнцонвадат уавæртæ ис. Реабилитацийы курс — 3 къуырийы.
Реабилитацийы центры кæнынц буар сфидар кæныны процедурæтæ. Уый тыххæй дзы æппæт хъæугæ дзаума ис. Кабинетты — нырыккон медицинон аппараттæ. Тренажерты залы куыд хицæн, афтæ иумæйаг тренировкæтæ. Бассейнæй дæр коляскæйыл бадæг адæймаг æнцонæй пайда кæны. Уымæй уæлдай, массаж, физиотерапи, магнитотерапи, электрофорез, лазеры терапи. Хъыгдард æнæниздзинадимæ адæймагæн æнæмæнг цы у, уый кусæндоны разамонæг Цæллагкаты Жаннæ хорз зоны.
Пациентты суанг компьютерыл архайын дæр сахуыр кæнынц. Хиирхæфсæн мадзæлттæ дæр сæм вæййы. Кæсын чи уарзы, уымæн — чиныгдон. Хæрæндоны та аразынц пайдаджын хæринæгтæ. Дыргъ, халсар, дзидза, æхсыры продукт — алцæмæй æххæст.
Уыцы иу рæстæг ис 50 адæймагæн лæггад кæныны фадат. Уыдонæй 36 — боныгон стационары, 14 — æхсæвбоны дæргъы. Кавказы иунæг æххæстæй ифтонггонд реабилитацион центр у. Адæймаг ивалиды креслойыл йæхæдæг æрбацæудзæн æмæ æппæт скæндзæн. Искæмæ æнхъæлмæ кæсын æй нæ хъæуы.
