Алыхуызон национ хæринæгтæ, сæракæй конд цымыдисаг дзауматæ æмæ ма хъазæнтæ дæр. Алкæмæн дæр дзы исты йæ зæрдæмæ æнæмæнг фæцæудзæн. Дзæуджыхъæуы сарæзтой сæрмагонд армукъа «Мæгуырдзинадимæ тох». Сæ кондад дзы равдыстой, социалон контратты руаджы йæ архайд чи æххæст кæны, уыцы амалхъом адæм. Паддзахады æххуысæй балхæдтой хъæугæ кусæнгæрзтæ æмæ æнтыстджынæй архайынц.
Басгæрдæджыты чысыл хуызтæ – ныртæккæ тынг парахат сты. Адæм сæ арæх райдыдтой хæрын, уымæн æмæ сты 5 хатты пайдадæр хуымæтæг басгæрдæджытæй. Адæймаг дзы пайда кæй исы, уымæ гæсгæ Анастасия Минаковайан ацы хъуыддаг йæ зæрдæмæ тынг фæцыд. Афæдзы размæ бафыста социалон контракт æмæ ныр архайы йæ куысты райрæзтыл.
Хи хъуыддаджы фыццаг къахдзæф акæнын æнцон нæу. Уый йæхæдæг бавзæрста Илья Стукалов. Ныр 5 азы дæргъы сæракæй кæны алыхуызон дзауматæ. Равзары æрмæстдæр хæрзхъæд сæрак. Скæны йыл нывæфтыдтæ дæр. Йæ сфæлдыстадон гæнæнтæ æмæ хъуыдытæ не ‘вгъау кæны. Архайы, цæмæй алы адæймаг дæр йæ конд дзауматы ‘хсæн ссара зæрдæмæдзæугæтæ. Фæлæ кæд Илья Стукалов йæхи тыхтæй райдыдта, уæддæр бахæццæ ахæм къæпхæнмæ, паддзахады æххуысы руаджы йæ архайд кæм адарддæр кодта.
Вæййы афтæ дæр – ис хъуыдытæ хи куыстуат саразынæн, фæрæзтæ та нæй. Уымæн та регионы архайы фæкæсынхъуаг цæрджытæн æххуысы программæ. Адæймагæн йæ бон у бафыссын социалон контракт паддзахадимæ. Æмæ афтæмæй хъуыдытæ царды рауадзын æмæ сæ мæнæ ахæм армукъаты равдисын.
Фæрæзтæй спайда кæнын, хиуыл кусгæйæ æмæ, хъуыдытæ царды уадзгæйæ. Социалон контракт у æнæмæнг хъæугæ æххуысы фæрæз. Зæгъын хъæуы уый, æмæ 2022-æм азы мониторингы хатдзæгтæм гæсгæ, контракт чи райста, уыдоны æфтиæгтæ фæфылдæр сты 2 хатты.
