Хæстон намысы бынæттæм абалц кодтой Дзæуджыхъæуы скъоладзаутæ. Бабæрæг кодтой Барбашовы номыл фæз æмæ Намысы аллея. Афтæмæй сæхи цæстæй федтой Суаргомы хъахъхъæнджыты музейы советон æфсæддонты æфсымæрон ингæн. Нæ республикæ Уæлахизмæ бахаста аргъ кæмæн нæй, ахæм æвæрæн. Уымæ гæсгæ хъæбатырты рухс нæмттæ фæлтæрæй-фæлтæрмæ нæ уыдзысты рох.
Советон салдаты хъæбатырдзинады истори. Ирыстоны бинонтæй хæсты быдырмæ чи ацыд, æмæ фæстæмæ чи нал сыздæхт, уыдоны хъысмæттæ. Æппæт уыцы цаутæ сывæллæттæ ам бæлвырдæй радзурынц. Экскурсийыл скъоладзаутæн бакуыстой сæмагондæй Уæлахизы бонмæ.
Хæстон цаутыл дзурæг бынæттæ сывæллæттæ бабæрæг кодтой сæ ахуыргæнджытимæ. Дыууын адæймагæй фылдæр биноныгдæрæй базыдтой фыды уæзæджы истори. Бирæтæ Фыдыбæстæйы Стыр хæсты историимæ нырма æмбæлдзысты ахуырадон программæйы, кæцыдæртæн та ацы темæ зонгæ у, экскурсийы размæ сæрмагондæй сæхи бацæттæ кодтой.
Фæндзæм къласы ахуырдзау Рустамæн хæсты темæ у хæстæг. Уый, йе`мкъласагимæ цымыдисимӕ базыдта Петр Барбашовы хъæбатырдзинады тыххæй, федта, знаджы цы æхсæн гарзæй цагъта, уый. Бацыдысты, мемориалон комплексы цы музей ис, уымæ дæр. Хи цæстæй федтой, советон сырхæфсæдтонтæ цы хæцæнгарзæй хæцыдысты знаджы ныхмæ. Раздæр иу ацы уæззау артиллери, гаубицæтæ сæ бон уыд фенын æрмæстдæр кинонывты. Ныр та сæм сæ бон къухæй бавналын дæр у.
Ахæм экскурситæ скъоладзаутæн фæлтæрдджын экскурсоводтимæ ноджыдæр ма араздзысты. Сæ нысан ахсджиаг — цæмæй сывæллæттæ историимæ канд чингуытæй ма зонгæ кæной, фæлæ сӕхи цæстæй уыной, советон æфсад цæй номыл не`вгъау кодта сæ цард, уый. Ӕмӕ уый къуыхы бафтдзæн æрмæстдæр Намысы æвдисæнтæм абалц кæнгæйæ.
