Æрæджы социалон хызæгты апарахат Дзæуджыхъæуы фитнес-центртæй иуы цы уавæр сæвзæрд, уый фæдыл хъусынгæнинаг. Йæ разамынд нæ разы кодта йе`æниздзинад хъыгдæрд кæмæн у, уыцы сывæллæтты ахуыртæм уадзыныл. Æхсæнад, уыцы уавæрæй сæнкъуысыд. Ныййарджытæ сæ хъаст бахастой республикæйы сæргълæууæг Сергей Меняйломæ. Регионы разамонæг бæрнон кусджытæн бабар кодта фарста аиуварс кæнын. Уавæр фæивта. Бæлвырддæр нæ дарддæры æрмæжы.
Сывæллæттæ доны сӕхи ныфсхастӕй дарынц. Сæ размæ æвæрд хæслæвæрдтæ сæххæст кæнынц. Дæрддзæф бынатмæ аленк кæнынц. Сæ фылдæр ерысты дæр архайдтой. Арæхдæр-иу систы уæлахиздзаутæ. Бассейны ахуыртæм алкæддæр зæрдиагæй фенхъӕлмӕ кӕсынц.
Ленк кæнын æмæ доны рæстæг æрвитын «хурæнгæс» сывæллæттæн у пайда. Бассейны хъарм дон ахӕм низджын сабиты буарæн у пайда. Доны ныххизгæйæ фæкъаддæр вæййы сӕ фӕтасӕнтыл уӕз, фӕлӕмӕгъдӕр вӕййынц сӕ нуӕрттӕ. Фӕсабырдӕр вӕййынц, сӕ тыхст дӕр аиуварс вӕййы.
Цæгат Ирыстоны паддзахадон университеты бассейны архайынц, йе ‘нæниздзинад хъыгдæрд кæмæн у, ахæм 10 сывæллоны. Æмткæй райсгæйæ, ахуыртæ цӕуынц сахаты бӕрц. Зæгъын хъæуы уый дæр, æмæ сывæллæттимæ кусы фæлтæрдджын тренер.
Ныййарджытæ стыр бузныг сты республикæйы сæргълæууæгæй, Цæгат Ирыстоны паддзахадон университеты разамынд æмæ бассейны директорæй. Уыдон æрбалæууыдысты сæ фарсмæ æмæ сын баххуыс кодтой. Ныййарджытæ сæхæдæг куыд зæгъынц, афтæмæй ацы ахуыртæ æмæ гæнæнтæ сæ хъӕбултӕн цы циндзинад хæссынц, уымæн аргъ нæй.
