Дзæуджыхъæуы такситæ дохтырты ласдзысты лæвар. Акци баст у æвзæр эпидемиологон уавæримæ. Уый тыххæй фехъусын кодтой парти «Иугонд Уæрæсе»-йы регионалон минæвæртты æмбырды. Архайдтой дзы республикæйы промышленность æмæ транспорты министр Мæрзойты Владимир, таксийы фирмæты æмæ медицинон куыстуæтты минæвæрттæ.
Æмбырды куыд фехъусын кодтой, афтæмæй суткæмæ дохтыртæ бабæрæг кæнынц цалдæр сæдæ рынчыны. Транспорт нæ фаг кæны. Ныр медицинон кусджыты бахъуаджы рæстæг ласдзысты, æрмæст тестытæ исынæй фæстæмæ, алы рынчынмæ дæр. Æмбырды рахастой уынаффæ такситы фирмæты ’хсæн поликлиникæтæ адих кæнын.
