Æвирхъау цауты рæстæг цæфтæ райсгæйæ афойнадыл фыццаг æххуыс бакæнын, зæрдæ æмæ рæуджыты реанимаци скæнын, уыимæ инструкторы амынддзинæдтæ раст æххæст кæнын. Алы лыстæгдзинадмæ дæр цæуы лæмбынæг каст. Экстремалон медицинæйы ахуырты Цæгат Ирыстоны архайдтой хъазахъхъæгты æхсæнад барадхъахъхъæнджытæ æмæ бархионтæ. Бæлвырддæр мадзалы тыххæй нæ дарддæры æрмæджы.
Æрхъуыдыгонд цаумæ гæсгæ, къорд бахауд æхстыты бын. Архайджытæн сæ иу уæззау цæф фæцис. Къорд алы бынæтты аппырх. Сæ хæс у, хъыгдæрд чи баййæфта, уый æдас ранмæ бахæццæ кæнын. Къуылымпы сæ кæны фæздæг. Фыццаг уал æй бахастой хæстæгдæр бынатмæ. Ам ын бакæндзысты фыццаг медицинон æххуыс.
Дарддæр цæф адæймаджы æдас ранмæ ахæссынц. Къамандыгæнæг, дохтыр æмæ пулеметæй æхсæг. Бирæвæрсыг медицинон æххуыс кæныныл ахуыр кæнынц сæрмагонд манекенты руаджы. Амонынц сын, адæймаг цæфтæ куы райса кæнæ йæ зæрдæ куы æрлæууа, уæд ын медицинон æххуыс раст куы бакæнын хъæуы, уый. Алы къордмæ дæр йæ цæст дары инструктор. Бæстон сын амоны алы лыстæгдзинадтæ дæр. Цæф рæнимæ раст архайын, туг æрлæууын кæнын.
Ахуырты архайынц хъазахъæгты æхсæнады минæвæрттæ, барадхъахъхъæнджытæ æмæ бархионтæ. Тохы быдыры экстремалон уавæрты хи бафæлварын нымайынц стыр пайдайыл.
Экстремалон медицинæйы ахуыртæ сарæзтой проект «Технологии выживания- тактическая медицина»-йы фæлгæты. Проекты разамонæг у медицинон наукæты кандидат, дохтыр-хирург, Донецкы адæмон республикæйы медицинон службæйы хистæр лейтенант Юрий Евич. Проекты райрæзтыл архайынц 5 азæй фылдæр.
Цæгат Ирыстоны ахуыртæ ацыдысты центр «Тактика»-йы æххуысæй.
Сæ зонындзинæдтæ ахуырты рæстæг фæфылдæр кодтой 30 адæймаджы. Фидæны ма сæ фæнд кæнынц республикæйы ногæй саразын. Уыимæ ма дзы архайдзæн фылдæр адæм.
