Дзæуджыхъæуы бакусдзысты транспортон змæлды сæрмагонд фæткыл. Республикæйы сæргълæууæг Сергей Меняйлойы уынаффæмæ гæсгæ йыл кусын райдыдтой фарон. Æххæст ӕй кæндзысты ацы аз дæр. Транспортон инфраструктурæйы рæзтыл бакусынмæ хицауад æрбахуыдта «Строй Инвест Проект» корпорацийы специалистты.
Санкт-Петербургы транспортон системæты институтимæ æмгуыст кæнгæйæ адæмы удæнцойæн сараздзысты иумæйаг транспортон схемæ. Æхсæнадон транспорты ӕмӕ онлайн хуызы горæты цæрджытæн сарæзтой æрфарст. Иртæстыты фæрцы хуыздæр базыдтой адæмы курдиæттæ æмæ фиппаинæгтæ. Уыдоныл æнцайгæйæ, ацы аз бацæттæ кæндзысты проектон сценарий. Транспортон пъланӕвӕрд кæй хонынц, уымæн уыдзæн цыбыр, рæстæмбис æмæ бирæмгъуыдон сценаритæ. Проектыл чи кусы, уыдон сæ хъус дардзысты дзуапдæттæг министрады амынддзинæдтæм дæр.
Цæгат Ирыстоны транспорт æмæ фæндаггон инфраструктурæйы комитеты сæрдар Солиты Тариэлы ныхæстæм гæсгæ, ног схемæйы руаджы фæндаггон змæлд Дзæуджыхъæуы æмæ æввахс хъæуты фæхуыздæр уыдзæн.
