30 адæймаджы архайдзысты «Медицинские кадры», зæгъгæ, проекты. Уый тыххæй фехъусын кодтой проектон офисы радон æмбырды. Сæрдариуæг дзы кодта нæ республикæйы сæргълæууæг Битарты Вячеслав. Архайджыты хыгъдмæ бахаудысты, республикæйы кусынмæ чи хъавы æмæ наукон иртæстытæ чи кæны, уыцы студенттæ. Æвзæрста сæ æнæниздзинад хъахъхъæныны министр Годжыцаты Тамерлан æмæ «Здравоохранение», зæгъгæ, программæйы разамонæг Туаты Ирмæ.
Проекты архайджытæ фидæны равзардзысты, нæ республикæйы цы дæсныйæдтæ нæ фаг кæны, ахæмтæ. Битарты Вячеслав бабар кодта, цæмæй снысан кæной ахуыргæнджыты æмæ æхцайы фæрæзты бæрц. Уымæй уæлдай ма республикæйы сæргълæууæг фæнысан кодта, цæмæй специалисттæн скæной хъæугæ уавæртæ кусынæн. Дзырдтой республикæйы цæрджыты диспансеризацийы хъуыддагыл дæр. Министрады разамонæг куыд бафиппайдта, афтæмæй йæ куыст кæны «Шатры здоровья», зæгъгæ, проект.
Фыццаг акци уал æрæджы сарæзтой кинотеатр «Теречы» раз. Йæ амидингæнджытæ сты 7-æм поликлиникæйы кусджытæ. Æнæниздзинад хъахъхъæныны министрад ацы акци аразын дарддæр дæр фæнд кæны. Цæудзæн куыд Дзæуджыхъæуы, афтæ районты дæр.
