Æфсæддон операцийы архайджытæн социалон æххуысы мадзæлттæ, цæрæнуæттæ балхæнынæн субсидитæ, лæвар юридикон æххуысы фарстатæ, стæй фæсивæдон парламенты ивддзинæдты тыххæй. Республикæйы Парламенты 10-æм æмбырды æрдзырдтой ахсджиаг фарстатыл.
Мобилизацимæ гæсгæ кæмæ æрсидтысты, уыцы цæрджыты бинонтæн, стæй æфсæддон службæгæнджыты, бархи æфсæддонты æмæ сæрмагонд æфсæддон операцийы рæстæг чи фæмард, уыдоны бинонтæн социалон æххуыс кæндзысты лæвар. Ныхас цæуы æрдæгстационарон æмæ стационарон лæггæдты хуызтыл. Закъоны проектимæ сразы сты 2-аг æркасты парламенты 10-æм æмбырды.
Æртæ æмæ фылдæр сывæллæттæ цы бинонты ис, уыдон райсдзысты субсиди цæрæнуæттæ балхæнынæн. Ныр ахӕм ӕххуыс æмбæлы, ӕртӕ кӕнӕ фылдӕр сывӕллоны хӕссынмӕ уыцы-иу ист чи ракодта, уыдонмæ дæр. Республикæйы хицауады закъоныпроекты тыххæй радзырдта фæллой æмæ социалон райрæзты министр Айдарты Алинæ.
Апрелы кæрон снысан кæндзысты Фæсивæдон парламенты ног уæнгты. Сæ нымæц фæкъаддæр уыдзæн 35 адæймаджы онг, сæ барты æмгъуыд та 2 азы онг. Уымæй уæлдай, æвзæрстытæ цæудзысты электронон хуызы.
Фарон лæвар юридикон æххуысы фæдыл Паддзахадон бюромæ фæсидтысты 1500 адæймагæй фылдæр. Уагдон кусы 2021-æм азæй Сергей Меняйлойы бардзырдмæ гæсгæ. Ныр юридикон æххуыс кæнын фæнд кæнынц, мобилизацимæ гæсгæ кæмæ æрсидтысты, уыцы цæрджытæн дæр. Уый сæрмагондæй Луганск æмæ Донецкы адæмон ркспубликæты территорийыл.
