Ахуыргæнæг арæхстгай æмæ лæмбынæг æвдисы куысты алы хай дæр. Уый фæстæ алы ахуырдзаумæ дæр, æнæмæнг, йе ‘ргом хицæнæй аздахы. Афтæ хорз фæстиуджытæм æрцæуынц. “Дизайны” хайады скульптурæтæ кæныныл æппынæдзух кусынц.
Адæймаджы сæры фæлгонц саразын æнцон нæу. Уымæй зындæр та – равдисын йæ зæрдæйы ахаст, цæсгомы æвæрд. Фæсивæдæн æххуыс кæны сæрмагонд дисциплинæты ахуыргæнæг Анна Смирнова. Йæ лæмбынæг цæстынгасæй иу лыстæгдзинад дæр нæ аирвæзы.
Ацы аудиторийы та студенттæ ныв кӕнынц цӕстуынгӕ объекттӕ Къуымæриттаты Зæринæйы разамындæй. Йæ алы фиппаинагмæ дæр ын лæмбынæг у Калоты Зауыр. Лæппу ныв кæнын йæ сабибонтæй уарзы. Аивадон училищæмæ æрмæст дыккаг хаттæй бацыд. Ахуыр кæнын дзы зын, фæлæ цымыдисаг у.
Дзæуджыхъæуы аивадон училищæйы ис 188 студенты. Ардæм бахауын æнцон нæу. Конкурс стыр у – иу бынатмæ æртæ адæймаджы. Ахуырадон уагдонæн хъæздыг истори ис, стæй бирæ зындгонд рауагъдонтæ. Абон училищæ бæрæг кæны йæ 50 азы юбилей. Уæвгæ, зындзинæдтимæ дæр æмбæлынц. Ам нæ фаг кæны ахуырадон æрмадзтæ, нæй дзы буфет, æнæмæнг хъæуы æмдзæрæн.
Æнусы ‘рдæгмæ училищæйы ныффидар сты хи академион традицитæ. Йæ рауагъдонтæ — стыр курдиаты хицæуттæ, уыдонӕй бирæтæ — æгас дунейыл зындгонд дæсны нывгæнджытæ æмæ скульптортæ.
