Социалон нысаниуæг кæмæн ис, ахæм объектты арæзтад, æнæниздзинад хъахъхъæнынады къабазы бæрæггæнæнтæ æмæ ахуырад. Абон республикæйы министрты кабинет, сæ сæргъы Дзанайты Барис, афтæмæй уыдысты Æрæфы районы.
Арæзтадон рыг, быроны голджытæ æмæ афтид къултæ. Нырма уал фидæны спортивон-дзæбæхгæнæн комплексы уавæр у ахæм. Фæлæ тагъд рæстæджы Цыколайы фæсивæд ам архайдзысты уæгъдибар хъæбысхæст, дзюдо, волейбол, баскетбол, акробатикæйæ. Æнхъæлмæ кæсын бирæ нæ бахъæудзæн. Куыстыты фæткмæ цæст дары хъæууон хæдзарады министры хæдивæг Къадзаты Игорь.
Уæлдай цæстдард — æнæниздзинад хъахъхъæнынадмæ. Профилон министр Тебиаты Сослан бабæрæг кодта Цыколайы поликлиникæ. 42 азмæ йæ цалцæг кæнынц фыццаг хатт. Ныр ам алцыдæр у ног. Медицинон уагдоны суткæмæ лæггад кæнæн ис 300 адæймагæн. Ис дзы сылгоймæгты æмæ сывæллæтты консультацитæ. Уымæй уæлдай, æппæт хъæугæ дохтыртæ. Сног кодтой техникон ифтонггæрзтæ дæр.
Ам райсæн ис онколог, хъусты, хъуырты æмæ фындзы дохтыры, цæстыты, зæрдæйы, дæндæгты дохтырты, хирург, эндокринолог æмæ æндæр специалистты æххуыс. Поликлиникæйæн ис йæхи лаборатори. Районы æххæст кæнынц программæ «Земский доктор», ис дзы архайыны фадат дæр.
Æрæфы районы цæрджытæн куыст дæттыны бæрæггæнæнтæ сты æппæтæй хуыздæр. Уый тыххæй фехъусын кодта профилон комитеты сæрдар Платы Альбинæ. Афæдзы æрдæгмæ æппынæдзухы, кæнæ рæстæгмæ куыст ссардтой, рады чи лæууыд, уыдоны 47%. 10 цæрæджы бафыстой социалон контракт. Комитет архайы æндæр здæхтыты дæр.
Ахуырад æмæ наукæйы министр Алыбегты Эллæйы æрбацыдмæ Цыколайы 3-æм скъолайы лагеры сывæллæттæ бацæттæ кодтой ирд флешмоб. Сæ программæ у бæстон арæзт. Вæййынц кванториумы, музейы, парчы. Цымыдисаг сын у скъолайы дæр. Ам ис спортивон секцитæ æмæ музыкалон ахуыртæ. Ныридæгæн цæуы дыккаг сменæ. Министр фæнысан кодта, сæрдыгон лагерь Æрæфы районы арæзт кæй у бæрзонд æмвæзадыл.
Дарддæр аразынц Цыколайы иуварсты фæндаг. Куыстыты цыд сбæрæг кодта хицауады сæрдар Дзанайты Барис. Ацы нысанæн рахай кодтой 950 млн сомы бæрц. Объект раттынвæнд кæнынц афæдзы кæрон, гæнæн ис æмæ раздæр. Ног фæндаг хъæуы уынгтæ транзитон транспортæй суæгъд кæндзæн. Баиу кæндзæн районы центр æмæ хохы Дыгуры хъæутæ. Йæ дæргъ — 8 километрмæ хæстæг, йæ уӕрх та фаг уыдзæн дыгай тæлмытæ саразынæн.
Лескены Дзанайты Барис бабæрæг кодта инвестицион проект «Фундук Алании». Специалисттæ фæнысан кодтой, Æрæфы районы кæй ис æппæт уавæртæ дæр æхсæр æрзайын кæнынæн. Уæлдай зылд æм нæ хъæуы, суанг ма хъæды дæр зайы. Сæйрагдæр та — проекты руаджы фæзынд куысты бынæттæ дæр.
Кусæг балцæн хатдзæгтæ скодтой сæрмагонд æмбырды. Дзанайты Барис бабар кодта финансты министрадæн, цæмæй Æрæфы районæн рахай кæной 3 млн сомы. Уыцы фæрæзтæй хъуамæ сæххæст кæной ахсджиагдæр хæстæ. Арæзтады æмæ хъæууон хæдзарады министрад транспорты комитетимæ иумæ бæрæг кæндзысты объектты бындурон цалцæджы цыд. Æнæниздзинад хъахъхъæнынады министрад та дарддæр кусдзæн «Земский доктор» æмæ «Земский фельдшер» программæты райрæзтыл. Афтечы пункттæ хъуамæ уой æппæт цæрæнбынæтты дæр. Туризмы комитет хъуамæ къæпхæнгай бацæттæ кæна Дыгуры туристон кластеры проект.
