Цæгат Ирыстоны хицауады сæрдар Дзанайты Барис кусгӕ балцы ацыд республикæйы районтыл. Бæрнон кусджытимæ федта, социалон нысаниуæг кæмæн ис, уыцы объектты арæзтад. Хицауады сæрдаримæ кусгӕ балцы уыд не сфæлдысталон къорд дæр.
Хицауады сæрдар фыццаг бабæрæг кодта Садоны зды æмæ цинкы комбинаты музей. Бындуронæй йæ цалцæг кæнынц Цæгат Ирыстоны Автономон Советон Социалистон Республикæйы 100 азы бæрæгбоны мадзæлтты фæлгæты. Куыстытæ цæуынц дыууæ къæпхæнæй. Ныридæгæн раивтой бæстыхайы сæр, бахизæнтæ æмæ рудзгуытæ. Сног кодтой инженерон хызæгтæ дæр. Ныртæккæ сæрдынц къултæ. Куыстыты фæткæй Дзанайты Барис разыйæ баззад.
Дарддæр премьер федта, Алагиры аргъуаны алфæмбылай цы аивгæнæн куыстытæ цæуынц, уыдон. Горæт фæуæлахиз æнцонвадат уавæртæ кæныны хуыздæр проекты æркасты. Ныридæгæн ам сæвæрдтой рухсы цæджындзтæ, æрбауагътой дон. Къахвæндæгтæ дæр цæттæ сты. Дарддæр ма сараздзысты сæрдыгон кинотеатр, спортивон фæз, базарадон фæзуæттæ æмæ æрмдæсныты куыстытæ уæйгæнæн бынæттæ. Æрыдоны та аив кæнынц Тæргайдоны былгæрæттæ. Куыстытæ райдыдтой апрелы. Проект у егъау. Ам уыдзæн спортивон æмæ сывæллæттæн хъазæн фæзтæ, бассейн, тезгъогæнæн бынæттæ. Фæлгæсæн фæз дæр цалцæггонд цæуы. Доны был фæзындзæн ӕхсæнадон мадзæлттæ аразæн æмæ шахмæттæй хъазæн бынæттæ, сценæ. Объекты арæзтад фæуыдзæн декабры онг. Дзанайты Барис районы разамындæн бабар кодта базилинаг фæзуæтты номхыгъд бацæттæ кæнын.
Кусгæ балцы кæронбæттæны премьер æркаст, «Дзæуджыхъæу-Æрыдон-Цыкола-Лескен 2» фæндагæн Мичурины иувæрсты цы хай цæуы, уый цалцæгмæ. Йæ фыццаг къæпхæн ын райдыдтой æртæ азæй раздæр. Проект тагъд кæронмæ æрхæццæ уыдзæн. Фæндаг эксплуатацийы раттынвæнд кæнынц иннæ аз. Дзанайты Барис дзуапдæттæг ведомствотæн бабар кодта объектмæ сæрмагонд цæстдард снысан кæнын. Куыстытæ хъуамæ æмбæлгæ фæткæй ма фæиппæрд уой.
