Æвдæмкъласонтæ физикæйæ ног темæ рацыдысты — Архимеды тых. Доны ныгъуылæг буары тых æмæ цы тæнгъд рассыдта, уый уæз æмиас сты. Сывæллонæн, æвæццæгæн, зын бамбарæн у ацы ныхæстæ, фæлæ сæ Джеранты Арнольд ахуыр кæны, цæмæй æфсæрмы ма кæной æмæ фæрстытæ дæттой. Педагог хъуамæ бæлвырд базона, сывæллæттæ æрмæг кæй бамбæрстой. Кæннод æй ногæй сфæлхат кæнын хъæуы.
Ацы скъола Мызуры иунæг у. Поселочы æрзæткъахæн фабрикæ куы сæхгæдта, уæд йæ цæрджыты нымæц зынгæ фæкъаддæр. Ныртæккæ ахуыргæнæндонмæ 170 сывæллоны цæуы. Раздæр та минмæ хæццæ кодта сæ нымæц. 7-æй 11-æм къласы онг физикæйы ахуыргæнæг у иунæг.
Ахуыргæнæг суыдзæн, уый æнхъæл никуы уыд Арнольд. Йæ фыд хими æмæ биологийы ахуыргæнæг у, фæлæ лæппуйы раздæр инженери æмæ медицинæ цымыдис кодтой. Цæгат Ирыстоны паддзахадон университет каст куы фæци, уæд æм Мызуры скъоламæ фæдзырдтой “Хъæуккаг ахуыргæнджыты” программæмæ гæсгæ.
“Хъæуккаг ахуыргæнджыты” программæйы руыджы курдиатджын педагогтæ дæрддзæф районтæм кусынмæ ацæуынц. Хъæуты та æппынæдзух кадртæ нæ фаг кæны. Физикæйы ахуыргæнæг та уæлдай зын у ссарын ныртæккæ.
Æмæ Джеранты Арнольд æрбаздæхдзæн Мызурмæ. 5 азмæ Цæгат Ирыстоны куысты ныллæууыдысты 49 специалисты. Фылдæр нæ фаг кæны англисаг æмæ уырыссаг æвзæгты, математикæйы æмæ физикæйы ахуыргæнджытæ. Программæйы архайæг педагогтæ райсынц милуан сомы. Уæрæсейы рухсады министр Сергей Кравцовы ныхасмæ гæсгæ, финансон æххуыс хъуамæ фæфылдæр уа.
Афæдзы дæргъы дæрддзæф хъæутæм кусынмæ ацæудзысты 10 специалисты. Хæстæгдæр æртæ азмæ — ноджыдæр 56-æй. Курдиат бадæттыны æмгъуыд у 11-æм апрелы онг. Куысты бынæтты хыгъд ис программæйы сæрмагонд фарсыл интернеты. Ахуырады хæрзхъæддзинад хуыздæр кæнынц “Фæсивæд æмæ сывæллæтты” национ проекты æххуысæй.
