Æмæ ма ноджыдæр иу æнæнхъæлæджы цауы тыххæй. Лæг, дам, бонæн диссаг куы нæ хъуса, уæд йын йæ цард ад нæ кæны. Цæвиттон, республикæйы онкологон диспансеры абон операциты рæстæг рухс æваст ахуыссын кодтой. Дохтыртæ фырадæргæй цы акодтаиккой, уый сæ сæр нал ахста. Хорз, æмæ сæм æвæстиатæй æрбахæццæ сты æнæхъæлæджы цауты управленийы кусыджытæ. Уæдмæ уал дохтыртæ куыстой, раст цыма 19 æнусы уыдысты, афтæ. Кæмæн куыд йæ фадат амыдта, афтæ рухс кодта операцион фæз. Улæфæн аппараттæ та сæ къухты даргæйæ кусын кодтой. Хи генератор диспансеры нæй. Нæ дзы куыста электрон тыхдæттæг дыккаг тел дæр. Фæнысан кæнын хъæуы уый, æмæ-иу ахæм цауты размæ электрон тыхуарæг куыстуат диспансерæн фехъусын кодта. Ацы хатт дзы ахæмæй ницы уыд, æмæ адæм Хуыцауы фæрцы аирвæзтысты.
Атайты Алан, онкологон диспансеры анестезиологи æмæ реанимацийы хайады сæргълæууæг: «Бамбарут-ма йæ, цы уавæры аззадыстæм, уый! Рынчынтæ стъолыл, операци æвЗКиппайды баурæдтам, къухæй кусын кодтам улæфæн аппараттæ, телефонтæй рухс сарæзтам, цæмæй цы кусæм, уый æмбарæм. Х ыцау хорз, æмæ ма операцийы кæронмæ 15-20 минуты баззад. Æмæ ма нын æй раздæр куы фехъусын кодтаиккой, уæд ма истытæ кодтаиикам.Ныронг-иу куыд уыдис, афтæ. Рагацау нæ-иу бафæдзæхстой æмæ-иу уыцы рæстæг нæ куыстам. Абон та нын ахæм митæ акодтой! Макуыуал хъуамæ бавзарæм ахæм цау! Хи генератор нæм куы уыдаид, уæд нæ фæтыхстаиккам. Зæрдæ нын æвæрынц, фæлæ кæд уыдзæн, уый нæ зонын. Æвæстиат службæтæ кæй æрбалæууыдысты нæ фарсмæ, уый нæ стыр бæллæхæй бахызта!»
Цæмæн афтæ рауад, зæгъгæ, фарстимæ атындзыдтам электрон тыхдæттæг куыстуатмæ. Куыд нын загътой, афтæмæй сæхицæн дæр ахæм уавæр æнæнхъæлæджы цау уыдис. Диспансеры разамындæн нæ фехъусын кодтой æрмæстдæр иу аххосаджы тыххæй – нæ йæ зыдтой, рухс æнæнхъæлæджы ахицæн уыдзæн, уый. Рабæрæг ма ис иу æвæджиауы хъуыддаг – медицинон кусæндон нæ хауы, рухсæй хицæн кæй нæй, уыцы организациты номхыгъды фыццаг категоримæ. Афтæ куы нæ уаид, уæд дзы рухс дæр нæ ахуыссыдаид æмæ фыдбылызы къахыл дохтыртæ не `рлæууыдаиккой. 1-аг къæпхæны объектмæ куы хаудаид диспансер, уæд ма йæм уæлæмхасæн электрон тыхы тел цыдаид. Ныр та уал хауы 2-аг къæпхæнмæ.
Абайты Таймураз, горæты электрон тыхдæттæг куыстуаты сæйраг инженер: «2-аг къæпхæны категоримæ чи хауы, уыцы куыстуæттæм æнæнхъæлæджы цауты рæстæг электрон тых хъуамæ радтæм 40 минутæй сахаты онг æмгъуыдмæ. Махæн диспансермæ ногæй электрон тых радтын бантыст иу сахат æмæ 18 минутмæ».
