Æнæрлæугæйæ ныр 67 азы чи кусы, уыцы Эзмийы гидроэлектростанцæйæн йæ тыхыл тых бафтаудзысты. Йæ хæрзтæй ифтонг кæны нæ республикæйы фæлхасгæнджыты. Фæлæ рæстæг йæ кæнон кæны æмæ куыстуаты ифтонггæрзтæ базæронд сты. Энергетикон комплексы ног цард бауадзæн ис æрмæст бындурон рацарæзты фæрцы.
Ацы уынæр ам никуы басабыр 1954-æм азæй фæстæмæ. Доны цыхцырджытæ, станцæйы зилгæ цæлхытæ ссонгæйæ, электрон тыхæй ифтонг кæнынц фæлхасгæнджыты. Фæлæ рæстæгимæ тохы цæуын никæмæн бантыст. Уæззау гидроагрегатæн йæ алы лыстæг хай дæр ныр арæхстгай халынц. Техникæ базæронд ис. Гидроэлектростанцæ хъæуы бындуронæй сцалцæг кæнын.
Зæронд ифтонггæрзтæй гидроэлектростанцæйы ницыуал баззайдзæн, иуылдæр сæ баивдзысты ногтæй. Станцæйы куыст æмæ æдасдзинадмæ йæ хъус чи дары, уыцы кусджытæн та сараздзысты ахуыртæ сæ фæлтæрддзинад фæхуыздæр кæнынæн. Æрмæстдæр уæд уыдзæн сæ бон ног станцæйы кусын.
Рацарæзты фæрцы станцæйæн фæфылдæр уыдзæн йæ хъомыс æмæ йæ куысты æмгъуыд дæр. Рæстæгмæ уал станцæйы куыст бауромын бахъæудзæн. Йæ хæсты уаргъ ын цыбыр æмгъуыдмæ бакæндзысты Зæрæмæджы гидроэлектростанцæйы бæрны. Уымæн йæ бон бирæ у, æмæ фæлхасгæнджытæй иу дæр æнæ электрон тыхæй нæ баззайдзæн. Фæстæдæр ног джиппыуагъд электростанцæ ногæй скусдзæн.
Эзмийы гидроэлектростанцæйы сæйраг пункт ис Терчы былгæрон. Уым йæ агрегаттæ цъирынц дон, сыгъдæг æй кæнынц змис æмæ быронæй. Цалцæггонд гидроэлектростанцæ йæ куыст сног кæндзæн 2024-æм азы 30-æм декабры.
Дзæдзойты Фатимæ
