Цæгат Ирыстон нæ бахауд, æвзæрстыты рæстæг электрон хуызы схъæлæс кæнæн кæм уыдзæн, уыцы субъектты хыгъдмæ. Уый тыххæй журналисттæн фехъусын кодта республикæйы центрон æвзарæн къамисы сæрдары хæдивæг Хъуыдаккаты Сослан.
Ахæм уынаффæ рахастой дыууæ аххосагмæ гæсгæ. Фыццаг – паддзахадон лæггæдты порталы Цæгат Ирыстоны пайдагæнджытæ курдиæттæ фаг кæй нæ ныууагътой, дыккаг та — республикæйы хъæуты интернет кусы къуылымпытимæ. Уымæ гæсгæ уал цæрджытæ схъæлæс кодтой фæлварæны хуызы. Йæ хатдзæгтæм гæсгæ схъæлæс кæнынмæ æдæппæтæй курдиæттæ балæвæрдтой 20 мин адæймагæй фылдæр. 12 мины бацархайдтой ног системæ сфæлварæны хъуыддаджы.
