Тамакоимæ тæрхæджытæ æмбæрзæнæй æхгæд не сты. Уый у Уæрæсейы фæлхасгæнджытæм цæстдарды управленийы специалистты фыццаг фиппаинаг. Уæйгæнæджы ныхæстæм гæсгæ, товар нырма ныртæккæ райста. Ацы дуканийæ хæстæгдæр скъоламæ ис сæдæ метрæй къаддæр. Афтæмæй, хæлд цæуы цæрджыты æнæниздзинад хъахъхъæныны фæдыл федералон закъон. Гæнæн ис, æмæ сыл тæрхондонмæ бахъаст кæной.
Пожарскийы номыл уынджы базарадон бынатæй сывæллæтты музыкалон скъоламæ ис æрмæст 60 метры. Дуканийы хицау куыд радзырдта, афтæмæй амалхъом адæймагæй регистрацигонд нæма у. Уымæ гæсгæ, товар нæма уæй кæны. Фæлæ дуканийы ныхыл фыст ис «Табак», зæгъгæ. Уымæй уæлдай, тæрхæджытыл тамакойы продукци. Ныридæгæн нæ кусы Гугкайы фырты номыл цы дукани ис уый дæр, зæгъы йæ хицау. 38-æм скъолайы онг ацы бынатæй ис æрмæст 90 метры.
Ацы дыууæ базарадон бынаты сты мидхъуыддæгты министрады цæстдарды бын. Никотинимæ хæццæ продукцийы уæйкæнынад бæрæггонд куы ‘рцæуа, уæд фæлхасгæнджытæм цæстдарды управленийы кусджытæ бадæтдзысты курдиат тæрхондонмæ. Афтæмæй, гæнæн ис, æмæ дукани æхгæд æрцæуа.
Сæрмагонд рейдтæ араздзысты æгас республикæйы дæр. Фæлхасгæнджытæм цæстдарды управлени ацы аз райста бар æнæ Прокуратурæйы разыйæ бæрæг кæнын тамако æмæ никотинимæ продукци чи уæй кæны, ахæм амалхъом адæмы куыст.
