Рахизфарсы районы зæхкусджытæ сæхи зымæгмæ цæттæ кæнынц. Зилгæйы, куыстуат «Дон»-ы бар ис 2 мин гектары зæхх. 500 гектары фæзуатыл байтыдтой фæзыгæнд хор. Ныртæккæ та хъæууон-хæдзарадон кустуæттæ сæхи ног сезонмæ цæттæ кæнынц. Куыд, уый базыдта не`сфæлдыстадон къорд.
Ацы быдырты чи кусы, уыдонæн сæ бон райдайы хуры скастимæ. Ныр дæр та куыстытæ сæ тæмæны бацыдысты. Байтыдтой фæззыгæндтæ, цалынмæ зæхх нæ ныссалд, уæдмæ. Хор зæххы бын уалдзæгмæ лæудзæн. куы фæхъарм уа, уæд та бавналдзысты уалдзыгæндтæ садзынмæ. Куыстуат «Дон»-ы сæйраг агроном Валерий Курилов Ирыстонмæ æрæджы ссыд. Куыд зæгъы афтæмæй компанийæн ам йæ авналæнтæ бирæ сты. Куыст дзы цæуы куыд æмбæлы афтæ.
Куыстуат «Дон»-ы сæйраг агроном Валерий Курилов: «Кавказы мæр Уæрæсейы æппæты хуыздæртæй иу у. Хæстæг лæуд у Воронежы æмæ Украинæйы сау мæры хæрзхъæддзинадмæ. Ахæм зæххытæ бирæ не`сты. Æрдзæй сæрмагондæй адæмæн сфæлдыста, цæмæй дзы мах сымахимæ хæрзад хойраг исæм».
Мæнæу байтыдтой 500 гектарыл. Æхцайы фæрæзтæ схардз кодтой иу милуан сомæй фылдæр. Хор Стъараполæй сластой. Ацы быдыртæм сæрмагондæй æппæты хуыздæр тауинæгтæ самал кодтой. Агромнтæ куыд зæгъынц афтæмæй сæ хæрзхъæддзинад зæрдæхсаинаг нæу. Ацы тауинæгтæн куыстуат паддзахадæй исы субсидитæ. Рахизфарсы районы администрадцийы нын куыд бамбарын кодтой, афтæмæй хи куыстуæттæ кæй фæзынд уымæй сты разы. Ныртæккæ районы ахæм куыстуæттæ 140 сты. Хор æрвитынц суанг фæсарæнтæм.
Рахизфарсы районы сæйраг агроном Туаты Зелимхан: «Ныртæккæ мах æфснайæм хор.Бæрæггæнæнтæм гæсгæ алы гектарæй дæр 63 центнеры систам нартхор. 200 центнеры скъахтам картоф. Хъæууон хæдзарадон хи кустуæттæм мах не`ргом здахæм. Æххуыс сын кæнæм тауинæгтæй. Уæдæ сæм хуым кæнынмæ дæр фæкæсæм».
Куыст æнтысджынæй банымайæн уыдзæн сæ пайда 130% куы уа, уæд. Цæмæй алцыдæр пъланмæ гæсгæ конд цæуа уымæ гæсгæ ацы куыстуаты фыдæбон кæнынц 15 адæймаджы. Бонмæ бахуым кæнынц 20 гектры зæхх. Фæзуаттæ зымæгмæ цæттæ сты. Агрономтæ æппæт куыстытæ дæр куыд æмбæлы, афтæ уазæлтты размæ бакодтой.
