1-æм июлы Цæгат ирыстоны скусдзæн ног проект «Прямые выплаты», зæгъгæ. Уымæ гæсгæ адæмæн сæ социалон фиддонтæ сæ куысты разамонджытæ нал фиддзысты. Фæлæ социалон фæдзæхстады фонды специалисттæ.
Уæлдай æхсызгон та у æмæ курдиат чи бадæтта, уыдон се хца исдзысты 10 кусгæ бонмæ. Цæмæй проект æнæкъуылымпыйæ æххæстгонд цæуа, уый тыххæй Дзæуджыхъæуы куыстуæтты хицæуттæн, бухгалтертæн æмæ компьютерон программæтæ аразджытæн сараздзысты ахуырадон семинар. Бон раздæр та ахæм семинар уыд Мæздæджы. Æрбацыд æм 200 адæймаджы. Цæгатирыстойнаг специалистты ахуыр кæнынмæ ссыдысты социалон фæдзæхстады фонды Ростовы регионалон хайады кусджытæ. Уым проект «Прямые выплаты» скуыста 2015-æм азы. Ахæм ахуырадон мадзæлттæ арæзт цæудзысты фонды æппæт регионалон хайæдты. Уæ зæрдыл уын æрлæууын кæндзыстæм, Уæрæсейы социалон фæдзæхстады системæ ивын райдыдта 2011-æм азы. Ногдзинæдтæ хауынц фæллойадон бадзырдтæм гæсгæ чи кусы, уыцы адæммæ æмæ куыстдæтджыттæм.
УФ-йы социалон фæдзæхстады фонды Ростовы хайады Таганроджы филиалы директор Надежда Редькина: «Бирæ куыстуæттæ сты уæззау финансон уавæры. Гæнæн ис æмæ сæ кæмдæрты банкротыл дæр банымайдзысты. Уый тыххæй сæ бон нæ вæййы сæ кусджытæн сæ социалон фиддонтæ фидын. Мах нæхимæ уыцы бæрн исæм æмæ кæмæн æмбæлы, уыдонæн сæ фиддонтæ бафиддзыстæм. Уыимæ нæ кæсæм, куыстуат цавæр уавæры ис, уымæ. Ацы проекты ныридæгæн 36 регионы архайынц».
