Мæхъæлы кусын райдыдта дзыллон информацион фæрæзты форум. Алы республикæ дæр дзы равæрдзæн йæ экспозици. Стыр æмбырды архайынц Цæгат Ирыстоны минæвæрттæ дæр. Уыдон дзы равдисдзысты нæ республикæйы рæзтыл дзурæг æрмæджытæ. Фылдæр æргом дзы аздахдзысты национ телеуынынады проектмæ. Фарон нæ республикæйы сæргълæууæг Битарты Вячеслав Иры дзыллæйæн дзырд радта, афæдзы фæстæ нæм ног телекомпани кæй скусдзæн, уый тыххæй. Æмæ йæ ныхас сæххæст кодта.
Фидæны информацион технологитæ…
Медиахызæджы æрхъуыдыдзинæдтæ ахæмтæ сты æмæ цыфæнды цаутæм дæр уыцы-иу рæстæг бакæсæн ис зæххы къорийы алы ран дæр. Ногдзинæдтæм йе `вæрæн бахаста Цæгат Ирыстон дæр. Дзыллон информацион форуммæ бацæттæ кодта Национ телеуынынады равзæрд æмæ газет «Северная Осетия»-йы юбилеймæ проекттæ.
Уæвгæ, Цæгат Ирыстоны дзыллон информацион фæрæзтæ бирæ æмæ алыхуызон сты: 44 мыхуыры рауагъдтæ, 20 журналы, 16 радио æмæ 10 телеканалы. Алчидæр сæ архайы адæммæ тагъд, раст æмæ æргом информаци хæццæ кæныныл.
Цард размæ цæуы, ивддзинæдтæ хæссы… Ивы æмæ парахат кæны форум дæр. Ацы аз сси æппæтдунеон. Ссыдысты йæм Казахстан, Абхази æмæ Хуссар Ирыстоны минæвæрттæ. Ныр бирæ бæстæты разамонджытæ, уацхæсджытæ, эксперттæ, блогертæ иумæ кусынц æмæ агурынц регионты рæзты мадзæлттæ.
Алыхуызон дискусситæ, дæсныйад æвдисæг ахуыртæ, равдыстытæ, тымбыл стъолтæ – дыууæ боны Цæгат Кавказы регионты уацхæсджытæ зонгæ кæндзысты кæрæдзийы фæлтæрддзинадимæ. Ацы аз форуммæ ссыд 500 адæймагæй фылдæр. Ныхас кæндзысты регионалон мыхуыры фæрæзты уавæрыл æмæ зындзинæдтæ куыд аиуварс кæнæн ис, ууыл.
Форумы кæронбæттæн та, фæткмæ гæсгæ, хуыздæр уацхæсджыты схорзæхджын кæндзысты хæрзиуджытæй.
Зыхъуаты Жаннæ, Æлбегаты Генриеттæ, Каджаты Алыксандр, программæ «Ирыстоны хабæрттæ».
