Нæ телекомпани кусын райдыдта. Алчидæр нæ æххæст кæны иумæйаг бæрнон хæстæ. Национ телеуынынад абон дæтты йæ фыццаг фæлварæн.
Техникон æмæ аивадон куысты нæ къухы цы æнтыстдзинæдтæ бафтыд.
Райхъуыст режиссеры ныхас «Стæм эфиры» æмæ, табуафси, телевизормæ кæсджытæ кæсынц Национ телеуынады программæтæм. Аппаратон студи — телекомпанийы сæйрагдæр бынат: музыкæйы зæлд, рухс, титртæ, суфлер, алцыдæр режиссеры амынддзинæдтæй аразгæ у æмæ сæ хъыгдарæн нæй.
Сыхаг кусæнуæттæ дæр мæлдзгуыты губаккæй уæлдай не сты. Видеомонтажы режиссертæ программæтæм цæттæ кæнынц сюжеттæ, техникон кусджытæ сæ хъус дарынц эфиры хæрзхъæддзинадмæ.
Бацæуæнты ныр дæр ма — кусæнгæрзтæ æмæ арæзтадон æрмæджытимæ къоппытæ. Бæстыхайы нырма цæуынц цаллцæггæнæн куыстытæ, фæлæ уæддæр телеуынынад эфирмæ цæттæ у.
Национ телеуынынады дыууæ студийы ис, нæ бон у дыууæ хатты фылдæр æмæ хуыздæр равдыстæ бацæттæ кæнын. Оператортæ æмæ амонджытæ иу минут дæр сæ куыст нæ уадзынц.
Цыфæнды телекомпанийы бындурыл дæр нымад у инфомацион службæ — Ньюсрум, зæгъгæ. Æгас республикæйы хабæрттæ дæр ардæм æмбырд кæнынц. Уацхæссджытæ сыл бакусынц, оператортимæ сисынц хъæугæ видеоæрмæджытæ. Ныртæккæ дæр æнæвдæлон сты. Эфирмæ цæттæ кæнынц æрмæджытæ.Уымæн æмæ алы кусæгæн дæр шеф-редактор радта хæслæвæрд.
Уыцы-иу рæстæг кусынц иннæ хайæдтæ дæр. Информацион службæйæ уæлдай национ телеуынынад æххæст уыдзæн алыхуызон тематикон æрмæджытæй.
Национ телеуынынад сырæзт. Дзыллон информацион фæрæзты ивгъуыд форумы Битарты Вячеслав зæрдæ бавæрдта иу афæдзмæ Цæгат Ирыстоны национ телеуынынад кæй скусдзæн, уымæй. Цыбыр рæстæгмæ бацæттæ кодтой гæххæттытæ, сарæзтой хъæугæ бæстыхæйттæ, балхæдтой æмбæлгæ техникæ æмæ кусæнгæрзтæ, ссардтой фæлтæрдджын специалистты. Æмæ ма кæд цыдæр лыстæг хъуыддæгтыл кæронмæ бакусын хъæуы, уæддæр æмткæй райсгæйæ эфирмæ цæттæ стæм. Зæрдиагæй уын зæгъæм «Уæ бон хорз. Эфиры национ телеуынынад æмæ уæ хонæм нæ программæтæм кæсынмæ».
Гогаты Марат
