Архонкæйы станицæйы æрæмбырд кодтой спаржæйы фыццаг тыллæг. Йæ хуымтæ йын хæдзарады байтыдтой афæдзы размæ æмæ сын ныр сæ хъæздыг дзуаппæй зæхкусджытæ баззадысты разыйæ.
Куыд зæгъынц, афтæмæй, дам, суанг мыггаджы зайæгойтæ кæмæй балхæдтой, уыдон дæр дисы бафтыдысты. Ирыстойнаг зæххыл спаржæ фидар фæхæцыд. Æдæппæтæй йæ хуымты фæзуат хæццæ кодта 65 гектармæ. Утæппæт тыллæг сæ бахъуыд къухæй æмбырд кæнын. Уæззау техникæйæ спаржæйы хуымты мæнæ-мæнæ не спайда кæндзынæ. Арæхстгай йæ æмбырд кæнын хъæуы. Цы билцътæ æруыгътой, уыдоны бæсты ног зайæгойтæ сæхиуыл схæцдзысты æмæ та ног тыллæг – цæттæ. Хорз ма уый у, æмæ зæхкусджытæ химион буаргъæдтæй кæй нæ пайда кæнынц. Æрмæстдæр æрдзон хъацæнтæ. Иу гектарæй æрæмбырд кодтой тыллæджы тоннæ æмæ `рдæг. Иннæ аз, дам, уыцы нымæц уыдзæн дыууæ хатты фылдæр. Кæм æй ауæй кæной, уый дæр ссардтой.
Спаржæйы фыццаг тыллæгыл сæхи амардтой бынæттон хæрæндæттæ, уæдæ дзы дзæвгар хай та Мæскуымæ арвыстой. Ныр акæс-акæс кæнынц Уæрæсейы арæнты æддæмæ дæр.
