Цæгат Ирыстоны аивадуарзджытæн та абон ногæй – бæрæгбон. Ирон театры кадджын уавæры сбæрæг кодтой Гæздæнты Булаты гуырæн бон. Ирон адæмон музыкæмæ стыр æвæрæн кæй бахаста Булат, уый дызæрдыггаг нæу. Бирæтæ дзы сты бузныг. Йе стыр куысты тыххæй йын паддзахад дæр скодта аккаг аргъ. Радтой йын Цæгат Ирыстоны фæллойы хъæбараты ном. Зæрдиаг арфæтæ йын ракодта не сфæлдыстадон къорд дæр.
Ирон фæндыры зæлтæ куы райхъуысынц, уæд, æвæццæгæн, бирæты цæстытыл Гæздæнты Булат ауайы. культурæйæн, фæндырдзагъдæн æмæ адæмæн бирæ азты чи лæггад кæны, уыцы уарзон артистты гуырæн бонмæ Ирон театрмæ бирæ адæм æрбамбырд. Алчидæр ыл, раст хиуоныл куыд бацин кæнынц, афтæ цин кæны.
Зæгъын хъæуы уый, æмæ Гаппойы фыртæн абон дывæр циндзинад æрхаста. Фыццаджыдæр йæ гуырæн бон бæрæг кæны йæ уарзон адæмы хсæн. Иннæмæй та абон йæ хæрзиуджытыл ноджы иу бафтыд – «Ирыстоны фæллойы хъæбатыр»-ы ном. Саккаг ын йæ кодтой республикæйы сæргълæууæг Битарты Вячеславы хъæппæрисæй.
Нæ республикæйы культурæйы министрады куысджытæ Гæздæнты Булатыл зæрдиагæй цин кæнынц. Æхсызгон сын у не республикæйы минæвæрттæ стыр хæрзиуджыты аккаг кæй сты, уый.
Гæздæнты Булат нæ республикæйы сæргълæууæджы къухтæй цы хæрзиуæг райста, уый Цæгат Ирыстоны фыццаг хатт лæвæрд æрцыд. Уый уæлдай кадыл нымад у.
Фæлæ Булик, йæхæдæг йæхи куыд хоны Булат, фыр æфсæрмæй цы фæуа, уый нæ зоны. Йæ хъуыдымæ гæсгæ ацы хæрзиуæджы аккаг Цæгат Ирыстоны бирæтæ сты. Фæлæ йын ахæм стыр аргъ кæй скодтой, уый йын æхсызгон у.
Гæздæнты Булатыл сæххæст 82 азы. Раздæрау у стыр хъаруйы хицау. Фидæнмæ йæхицæн снысан кодта бирæ ног музыкалон композицитыл бакусын. Уымæн та йын стыр æххуыс 40 азы дæргъы цы национ инструментты ансамблы сæргъы лæууы, уый.
