Бирæтæ афтæ хъуыды кæнынц, цыма техникон ӕгъдауӕй ленк кӕнын базонӕн ис ӕрмӕстдӕр гыццылӕй. Фӕлӕ Беслæны спортивон-дзæбæхгæнæн комплексы бассейн арӕхӕй-арӕхдӕр ахсынц, 30, 40 æмæ суанг 70 азæй фылдæр кæуыл цæуы, уыдон дæр. Цӕмӕн сыстынц ӕнтыстджын юристтӕ, инженертæ æмæ пенсиисджытæ сæумæрайсом æмæ цæй фæдыл æрбацæуынц ардæм?
“Фыццаг-иу 10-15 метры аленк кæнгæйæ дæр тыхулæфт кæнын райдыдтон. Ныр цыма мӕ биологон кар дæр фӕкъаддӕр, афтæ мæ мæ фӕсонты рыст ферох”, — зæгъы Дзусаты Мухтар.
Æмæ, æцæгдæр, дохтыртæ куыд зæгъынц, афтæмæй ленк кӕнгæйæ сфидар вæййынц зӕрдӕйы тугдадзинтæ, басудзы 400-йæ 700-йы онг килокалорийы сахатмæ, хуыздæр кæны æгас буары хӕцъӕфты уавæр ӕмӕ тасындзинад. Æппынæдзух тренировкӕтӕ сисынц астӕуыхъæды уæзæвæрд, фæхуыздæр вæййы фын. Уæдæ æрхӕджытӕ дæр фæрогдæр вæййынц.
Ацы æппæт хорз æууæлтæ йæхиуыл банкъардта 77-аздзыд Галина Помилуйко дæр. Ардæм 20 азы размæ æрбацыд, фæстравмæ.
Бассейны уæлхъус — дыууæ тренеры æмæ дохтыр. Уыдон æппынæдзух цæст дарынц ленкгæнджытæм. Донæй анализ исынц бон цыппар хатты, æртæ хатты та йын йæ температурæ сбарынц.
Бассейнмæ чи цæуы, уыцы хистæрты нымæц сæдæмæ хæццæ кæны. Архайынц къуыри æртæ хатты. Иутæ райсомæй, иннæтæ — изæрыгон. Уæгъд рæстæг сæ кæмæн куыд ис, афтæ.
“Æнæниз буары — æнæниз уд!” — ахæм девизимæ цæрынц бассейны æппынæдзухы уазджытæ. Паспорты нысангонд кар та хонынц ӕрмӕст хронологон нымӕц. Хынцы, адæймаг цы азтӕ фӕцард, уыдон, ӕнӕниздзинады уавӕр нæ бæрæг кæнгæйæ. Æмæ сæ дæнцæг æппæтæн дæр — фæзминаг.
