Хицауады æмбырд

Сæ 70% проценты сты Битарты Вячеславы номыл. Уый сбæрæг нæ республикæйы хицауады радон æмбырды. Æвæрццæг уынаффæтæ рахастой курдиатты 10%-æн. Премьер-министр Тускъаты Таймуразы ныхæстæм гæсгæ, цыфæндыйы цæстæй кæсын адæмы фыстæджытæм нæ хъæуы. Æмбырды ма æвдыст æрцыдысты нæ республикæйы 2017-æм азы социалон-экономикон райрæзты хатдзæгтæ. Нæ республиикæйы экономикон рæзты министр Томайты Хъазыбеджы ныхæстæм гæсгæ, æмтгæй райсгæйæ ивгъуыд аз уыд æнтыстджын: республикæ ссардта куыд бюдджетон, афтæ æнæбюджетон уæлæмхасæн фæрæзтæ. Промышленность æмæ хъæууон хæдзарады къабæзты уавæр та хуыздæрырдæм раивта. Уымæй уæлдай ма, стратегон райрæзты агентады сарæзтимæ нæ республикæйы фæзынд инвестицитæ. Рæзынц кæсагдарæн æмæ дыргъдæттæг хæдзарæдтæ. Министырты кабинеты æмбырды ма æрдзырдтой, сæ цæрæнбынæттæ фæхуыздæр кæныны тыххæй фæрæзтæ кæмæн æмбæлы, уыдоны номхыгъдтыл. Ахæм субсидитæ райсдзысты Фыдыбæстæйы стыр хæсты 2 ветераны Дыгуры районы, 22 ветераны идæдз бинойнаджы, се ‘нæниздзинад хъыгдард кæмæн у, ахæм артæ адæймаджы, 209 лыгъдæтты бинонтæ. Боныфæткы ма уыд Хуссар Ирыстонимæ дыууæ иумæйаг къамисы саразыны фарстатæ. Сæ иу уыдзæн ирон æвзаджы терминологи бæрæгкæнæн, иннæ та – национ-культурон райрæзты дыууæ Иры ‘хсæн æмгуыстады фарстаты тыххæй экспертон къамис. Къамистæ арæзт цæуынц ивгъуыд азы декабры цы национ райрæзты паддзахаон программæ фидаргонд æрцыд, уый фæлгæты.