Нæ дарддæры æрмæг та — йæ равзæрст дæсныйадыл æнувыд адæймаджы тыххæй. Хъодзасты Аннæ у физикæйы ахуыргæнæг. Йæ цард æрмæстдæр скъолаимæ кæй сбæтдзæн, уый хæрз æрыгонæй бамбæрста. Разæнгард æй кодтой йæхи ахуыргæнджытæ — кæддæриддæр æххуысмæ цæттæ æмæ сабитыл æнувыд адæм. Абон ахæм педагог у йæхæдæг. Дигорайы 2-æм скъолайы физикæйы уроктæ адзух цымыдисаг рауайынц. Уымæй уæлдай, Аннæ амоны мультипликацийы уæлæмхасæн ахуыртæ.
Хъодзасты Аннæйæн йæ алыварс кæддæриддæр уыд зондджын æмæ фæлтæрдджын педагогтæ. Уыдонмæ гæсгæ сбæлвырд йæ фидæны дæсныйад дæр. Уæлдæр ахуырады фæстæ æрбаздæхт йæ райгуырæн Дигорайы 2-æм скъоламæ физикæйы ахуыргæнæгæй кусынмæ. Ацы хъуыддаг йæ ахуыргæнджытæн тынг æхсызгон уыд.
Ахуыргæнæджы куыстæн йе стырдæр зын — сывæллоны зæрдæмæ фæндаг ссарын. Фæллæ Аннæйæн уый бантыст. Сабитæ йæ уарзынц, æргомзæрдæ кæй у, уый тыххæй. Хуымæтæг ахуыргæнæгæй уæлдай сын у хорз хæлар æмæ зондамонæг. Кæддæриддæр сæ фарсмæ æрбалæууы. Баххуыс кæны рæдыд сраст кæнын, бацамоны раст фæндаг. Æвæццæгæн, ахуыргæнæджы куысты сæйраг мидис ацы æууæлты ис, — зæгъы Аннæ.
Алы ахуыры рæстæг дæр æнæмæнг у — скъоладзауты зын предметмæ сцымыдис кæнын. Уæд хистæркъласонтæ æнцондæрæй бамбарынц ацы зонады лыстæгдзинæдтæ. Хъодзасты Аннæ у уæлдæр къæпхæны ахуыргæнæг. Йæ урокты æнкъард нæ вæййы. Æппынæдзух иртæстытæ, эксперименттæ. Афтæмæй ног темæмæ алы ахуыргæнинаг дæр лæмбынæг фæхъусы. Йе ‘мкусджытæ та йын йæ дæсныдзинады тыххæй уæлдай стыр аргъ кæнынц.
Физикæйæ уæлдай, Аннæ амоны мультипликацийы ахуыртæ. Уыдон дæр сабиты зæрдæмæ тынг цæуынц. Ам сæхæдæг сфæлдисынц сæхи мультфильмтæ. Дыууæ азмæ сарæзтой 8 кинонывы. Скъолайæ уæгъд рæстæг та бабæрæг кæнынц алыхуызон мадзæлттæ.
Хъодзасты Аннæйы ахуырдзаутæ та ацы аз дæр скъолайы фæстæ дарддæр царды фæндæгтыл ацæудзысты. Фæндараст зæгъын сын æнцон нæ вæййы. Фæлæ сæм йæ зæрдæ не ‘хсайы. Сæ хъомыладмæ сын цы æвæрæн бахæссы, уымæн фидар бындур ис.
