Сергей Меняйло видеобастдзинады фæрцы архайдта æнæххæст мобилизацийы тыххæй информаци адæммæ хæццæ кæныны фæдыл сæрмагонд æмбырды. Амыдта йæ Уæрæсейы хицауады сæрдары хæдивæг Дмитрий Чернышенко.
Фыццаджыдæр, æмбырды фæнысан кодтой, адæмæн сæ бон кæй у спайда кæнын портал «Объясняем.РФ»-æй, стæй сæрмагонд номыр 122-мæ бадзурын. Уым бæрвырд дзуаппытæ райсдзысты мобилизациимæ баст фæрстытæн. Уæ зæрдыл уын æрлæууын кæндзыстæм, Уæрæсейы хицауады сæрдар Михаил Мишустины уынаффæмæ гæсгæ, Паддзахадон лæггæдты порталы бакуыстой, мобилизацийы фарстаты фæдыл чи кусы, дыууæ ахæм ног сервисыл. Уыдонæй иу – «Стать добровольцем» – барвæндонæй æфсæддон операцийы архайын кæй фæнды, уыдонæн.
Дыккаджы та ис хъаст бадæттæн, кæд æнæххæст мобилизацийы фæлгæты адæймагмæ раст нæ фæсидтысты, уæд. Æппæт курдиæттæ дæр æрвыст æрцæуынц регионалон æфсæддон къамистæм. Дмитрий Чернышенко куыд фæнысан кодта, афтæмæй æнæххæст мобилизацимæ цы нæлгоймæгтæ нæ хауынц æмæ барвæндонæй дæр æфсадмæ кæй нæ исынц, фæлæ йæ æвæрæн бахæссын кæй фæнды, уыдонæн сæ бон у, куыд волонтёртæ, афтæ архайын.
