Абонæй фæстæмæ нæ планетæйы цæгатаг æрдæгкъорийы бон райдыдта цыбыр кæнын. Æппæты даргъдæр бон фæстейы аззад. Ахæм астрономион фæзынд иронау Хурхæтæн хуыйны.
Уыцы рæстæг нæ сыхаг стъалы ахизы уæларвон эклиптикæйы тæккæ дарддæр раныл. Афæдзмæ ахæм Хурхæтæнтæ вæййы дыууæ: зымæджы æмæ сæрды. Ныртæккæ чи райдыдта, уый амоны æцæг сæрды ралæуд. Зæххы хуссайраг æрдæгкъорийыл та йæ тыхы бацæуы зымæг. Ацы бонты Хуры тæлы арвмæ скъахдзæф кæны цæгат-скæсæнырдыгæй æмæ амбæхсы цæгат-ныгуылæнырдыгæй. Йæ фæндаг арвы роныл вæййы æппæты даргъдæр. Бонтæн къорд рæстæджы сæ дæргъ иухуызон рауайы. Хур та арвыл бацахсы æппæты уæлдæр бынат. Нæ бæстæйы цæгатагдæр рæтты та æмбæхсгæ дæр нал фæкæны. Санкт-Петербурджы, зæгъæм, райдайынц «урс æхсæвтæ», Уæрæсейаг Арктикæйы та – полярон бон. Уыйфæстæ Хур йæ ных саразы хуссарырдæм, бонæй-бонмæ ныллæгдæр кæнгæйæ. Æмæ афтæ – суанг декабры `мбисмæ, цалынмæ зымæджы Хурхæтæн нæ райдайы, уæдмæ.
