Ацы темæмæимæ баст у нæ дарддæры `рмæг дæр. Абон Нартыхъæуæй Фыдыбæстæйы Стыр хæсты чи фæмард, уыдоны номыл хъæуы мемориалы уыд кадджын мадзал. Волгоградæй, Дулаты æфсымæрты ингæнтæй, сластой дыууæ капсулæйы. Кадджын уавæры сæ бавæрдтой хъæуы Мемориалы.
Æвзонг бархионты къухты дыууæ нæмыджы, сæ мидæг – Волгоградæй ласт мæр. Ацы зæхх у, æхсар æмæ лæгдзинад кæм ахъардтой, ахæм. Фыдыбæстæйы Стыр хæсты рæстæг баудæст советон салдæтты тугæй. Нартыхъæуккаг, Дулаты дыууæ æфсымæры туг дæр уым ныккалд.
Капсулæты цы зæхх æрбаластой, уый сбаста Ирыстон æмæ Волгоград. Дыууæ `фсымæры, сæ карыл æртыгай, цыппæргай азтæ бафтаугæйæ, араст сты фронтмæ. Фæлæ сын «ацу `мæ ма `рцуйы» фæндаг рауад. Кæм ныгæд сты, уый сæ бинонтæ зонгæ дæр нæ кодтой. Сæ кæстæр хо Меретхан æмæ йæ чызг Залинæ сæ абоны `мгъуыдмæ агуырдтой. Залинæ дунетыл æрзылд йæ мадыфсымæрты фæд-фæд, фæлæ никуы æмæ ницы. Фæлæ Хуыцауы цы нæ бафæнда æмæ цы нæ сараздзæн.
Астемыр æмæ Дзантемыр уыдысты Сталинграды тугкалæнты. Цæгат Ирыстонæй с` адзал цы 5000 мин салдаты ссардтой, уыдоны `хсæн. Хæсты арйдианы ма-иу Меретханыл йе `фсымæрты фыстæджыты Хуыцауы хорзæхау сæмбæлдысты. 1943-æм азы сæ райста фæстаг рæнхъытæ. Дарддæр – зыбыты æбæрæгдзинад. Фыстæджытæй фыдыуæзæгмæ чи фæхæццæ, уыдонæн дæр сæ кой нал ис.
Дулаты æфсымæрты ном ссарынмæ абон Нартыхъæумæ æрцыдысты республикæйы ветеранты советы минæвæрттæ, театралон архайджыты цæдис, уæрæсейы ахуырдзауты змæлд. Уымæй уæлдай мадзал æрбамбырд кодта Дулаты мыггаджы æмæ бынæттон цæрджыты.
Ныртæккæ Меретханыл цæуы 90 азы, ис ын 5 сывæллоны, уыдоны кæстæртæ сты 12, уæдæ хæдзары дарддæры фæлтæр та фæхъæздыг 10 сабийæ. Зæронд ус йæ абоны цардæй разы у. Фæлæ йæ дыууæ `фсымæры йæ зæрдыл куы `рбалæууынц, уæд йæ цæстытæ доны разилынц. Хъуыды сæ кæны æрыгон æмæ хæрзуындæй, бæллы, се `нусон бынат кæм ссардтой, уыцы ран бабæрæг кæнынмæ.
