Цæгат Ирыстоны ныр цалдæр азы дæргъы, се`нæниздзинад хъыгдæрд кæмæн у, уыцы сывæллæтты аивадмæ æмхиц кæнынц. Хъуыддагмæ егъау æвæрæн хæссы Театралон цæдис. Проект «Театральная неотложка»-йы фæлгæты арæзт цæуынц алыхуызон инклюзивон къордтæ. Сæйраг нысан – сабийы фарсмæ æрбалæууын, фидæнмæ йын ныфс бавæрын. Алцыдæр – аивады æххуысæй.
Уды рис фæкъаддæр кæнын, фидæнмæ ныфс бавæрын, зæрдæйы хъарм ма æвгъау кæнын. Ахæмтæ сты инклюзивон театралон къорды сæйраг нысæнттæ. Цудыд æнæниздзинадимæ адæмимæ аивады хи фæлварын райдыдтой 6 азы размæ. Фыццаг театралон къорд фæзынд ацæргæ адæмы хæдзар «Узæлд»-ы проект «Театральная неотложка»-йы фæлгæты къорд «Вдохновение». Уæд адæмы размæ рахастой Чеховы уацмысы бындурыл æвæрд спекталь «Свадьба».
Дарддæр Хабæты Ханзарифæимæ сфæнд кодтой иумæ, йе`нæниздзинад хъыгдæрд кæмæн у, уыцы фæсивæдимæ бакусын. Афтæмæй фæзынд театралон студи «Радугæ», зæгъгæ. Чысыл фæстæдæр хæдзар «Узæлд»-ы Хъæцмæзты Маринæйы æххуысæй фæзынд сæрмагондæй театралон къордæн бынат. Уæдæ психолог Марина Абуталиповайы фæрцы райстой хъæугæ амынддзинæдтæ, æмæ кусын райдыдтой, дзурын кæй бон нæу, ахæмтимæ дæр. Нырма уал фæлварæны хуызы.
Сæ удуæлдай куысты руаджы инклюзивон аивады архайджытæн сæ къухы бафтыд бирæ æнтыстдзинæдтæ. Аргъ сын кæнынц суанг æгас Уæрæсейы дæр. Сты раззагдæртимæ. Æмткæй райсгæйæ, республикæйы ныртæккæ ис 7 инклюзивон театры. Хæрз æрæджы ма фæзынд Мæздæджы районы дæр. Йæ разамонæг Елена Давыдова. Ныфсджын, курдиатджын адæймаг. Йæ куыстæн ын аргъ дæр кæнынц.
Зæгъын хъæуы уый, æмæ Театралон цæдис у Инклюзивон аивады ассоциацийы уæнг. Методикон æгъдауæй сæм уыдон фæкæсынц. Афтæмæй, аивады фæзилæнты æмархайд кæнынц. Сæ арæхстдзинадæн сын аргъ скодтой театралон фестиваль «Шаг к успеху»-йы дæр. Театралон къорды хъомылгæнингтæ ахæм арф айстой сæ зæрдæтæм театралон цард, æмæ сæ фæнды сæхи ацы къабазы фæлварын. Уымæн æвдисæн спектакль «Ацæмæзы уандындз».
Стыр науæн хъаумæ йæ фæндæгтæ уой уæрæх. Ныртæккæ театралон цæдисы уæнгтæ архайынц театралон къорд Хуссар Ирыстоны дæр байгом кæнын. Уый хыгъд ма кусынц Узеир Гаджибековы пьесæ «Аршин мал алан»-ыл. Фидæны йын уыдзæн премьерæ.
