Цæгат Ирыстоны информацион технологитæ æмæ бастдзинады управленийы скодтой куысты хатдзæгтæ 2020-æм азæн. Паддзахадон лæггæдты фылдæр хай ныр райсæн ис электрон хуызы. Дохтырмæ ныффыссын, кæнæ коронавирус куыд рабæрæг кæнæн ис, уый базонæн та уыдзæн иумæйаг æххуысы номыр -122-мæ бадзургæйæ. Управленийы куыст рауад æнтыстджын æмæ бирæвæрсыг.
Ахæм хуызы ног къуырийæ республикæйы кусын райдайдзæн сæрмагонд интеллектуалон æххуысгæнæг «Зæлинæ». Иумæйаг æххуысы номыр 122 -мæ бадзургæйæ базонæн уыдзæн коронавирусы бæрæггæнæнтæ, дохтырмæ фæдзурын æмæ бирæ æндæр фарстаты фæдыл. Номырмæ бадзурæн уыдзæн лæвар.
Сентябры Цæгат Ирыстоны кусын райдыдта регионы разамынды центр. Цæгат Кавказы регионты ‘хсæн у фыццаг. Центры хæс у адæмы курдиæттæ æмæ фарстатæ æмбырд кæнын сайттæ, порталтæ, социалон хызæгтæ æмæ æвæстиатон бастдзинады номыртæй. Центры нысан у ведомствæтæ æмæ хицауады органты ‘хсæн бастдзинад афтæ саразын, цæмæй фарстатæ æвæстиатæй лыггонд цæуой. Ноябры республикæйы сарæзтой нымæцон технологиты æмвæзад фæуæлдæр кæнынæн «цифровая прокачка», зæгъæ сесси. Къабазы хуыздæр эксперттæ æрныхас кодтой, регионы нымæцон рæзтыл куыд бакусæн ис, ууыл.
50 паддзахадон лæггадæй фылдæр ныр райсæн ис электрон хуызы. Кæд фыццаг электрон сервисты куыст къуылымпытимæ цыд, уæд ныртæккæ æпппæт хъæндзинæдтæ дæр аиуварс кодтой. Пандемийæйы рæстæг куыст ахæм хуызы саразын уæлдай ахсджиаг уыд. Электрон сервисты куыстмæ æппынæдзух управленийы специалисттæ сæ цæст дарынц. Ацы аз бастдзинад бахæццæ республикæйы дæрддзæф районтæм дæр.
Ацы аз республикæйы дарддæр æххæстгонд цæуы проект «Яндекс-лицей». Йæ руаджы скъоладзаутæ уæлдæр кæнынц сæ нымæцон зонындзинæдтæ. 2020 азы цæгатирыстойнаг скъоладзау бахауд Уæрæсе æмæ Казахстаны проекты архайджыты хуыздæрты хыгъдмæ.
