Хуыздæр дохтыры ном хæссынæнæн цы æркаст расидтысты, уый дыккаг къæпхæн ахицæн. Бацархайдтой дзы 34 медицинон кусæджы.
Конкурс арæзт у дыууæ номинацимæ гæсгæ – «Хуыздæр дохтыр-терапевт» æмæ «Хуыздæр дохтыр-педиатр». Æркасты сæйраг домæнтæм гæсгæ, алы кусæгмæ дæр хъуамæ уа сæ дæсныйадмæ гæсгæ сæрмагонд æвдисæндар, стæй дохтыры куыст та хъуамæ 5 азæй къаддæр ма кæной. Цæмæй иннæ къæпхæнмæ рахизой, уый тыххæй архайджыты хъуыди 60 фарстæн дзуæппытæ раттын.
Дохтырты куыстæн аргъ кæнынц дыууæ профилон къамисы. Се ‘сконды сты Æнæниздзинад хъахъхъæныны министрады сæйраг специалисттæ æмæ поликлиникæты сæйраг дохтыртæ. Конкурсы уæлахиздзау райсдзæн фатер æмæ йæ схорзæхджын кæндзысты «Хузыдæр дохтыр»-ы риуылдаргæ нысанæй. Æркаст ахицæн уыдзæн январы. Аразынц æй республикæйы сæргълæууæг Битарты Вячеславы хъæппæрисæй. Конкурсы сæйраг нысан – медицинон куыстуæттæ дæсны кусджытæй ифтонг кæнын.
