200 сывæллоны сæхи аирхæфсдзысты Сау денджызы был. Абон поездæй араст сты Анапæ æмæ Сочимæ. 100 адæймагмæ дзы æнхъæлмæ кæсынц санаторий «Голубая волна»-йы Анапæйы. Иннæ 100 сывæллоны та баулæфдзысты санаторий «Премьер»-ы Сочийы. Уæвгæ, æдæппæтæй ацы сæрд Цæгат Ирыстонæй денджызы был сæ фæллад суаддзысты 1200 сывæллоны. Уыдонæн сæ фылдæр сты фæкæсынхъуаг æмæ бирæсывæллонджын бинонтæй. Се ‘хсæн ма – се ‘нæниздзинад хъыгдард кæмæн у, ахæм сывæллæттæ. Цæуы сыл 7 азæй 15 азы онг. Æрвылмæй нæ республикæйæ денджызмæ æрвитдзысты сабиты фæйнæ дыууæ къорды. Фæндагыл семæ цæуынц сæ хъомылгæнджытæ æмæ барадхъахъхъæнæн оргæнты кусджытæ.
Сывæллæттæн санаториты бацæттæ кодтой хъæздыг æмæ мидисджын программæтæ. Хæрын сын кæндзысты бон 5 хатты. Дыууæ санаторийы дæр, специалистты бæрæггæнæнтæм гæсгæ, дзуапп дæттынц æппæт санитарон æмæ æдасдзинады домæнтæн. Ахæм балцытæ хъуамæ хуыздæрырдæм сахадой сывæллæтты æнæниздзинадыл.
