Фæлладуадзæн бонты рæстæг Паддзахадон автоинспекци араздзæн рейдтæ расыг шофырты ахсыны тыххæй. Иртæстытæ цæудзысты республикæйы егъаудæр фæндæгтыл.
Автоинспектортæ ма иу хатт адæмы зæрдыл лæууын кæнынц, расыгæй кæй æрцахсой, кæнæ та расыг у, зæгъгæ, бæрæг кæнынмæ чи нæ кома, уыцы адæймаджы карзæй кæй æфхæрдзысты. Закъонмæ гæсгæ, ныртæккæ ахæм шофыртæ хъуамæ фидой ивар 30 мин сомы бæрц. Афæдз æмæ `рдæгæй 2 азы онг æмгъуыдмæ сын исдзысты сæ шофыры æвдисæндартæ. Йæ хæдтулгæйыл дæр уæдæ йæ бартæ нал цæудзысты. Уый-иу бамидæг кæндзысты иварон фæзы. Дыккаг хатт ма инспектортæ кæй æрцахсой, уый та бынтон йæхи сарæзта. Дзуапп дæттын æй хъæудзæн уголовон æгъдауæй.
Инспекцийы кусджытæ сидынц адæммæ дæр, цæмæй сын хъусын кæной, дзой-дзойгæнгæ хæдтулгæйыл чи сбада, уыдоны тыххæй. Цы фиппаинæгтæ сæм хъусын кæной, уыдонмæ инспектортæ кæсдзысты æнæмæнг. Æрмæстдæр æмдых-æмзондæй бахъахъхъæнæн ис республикæйы фæндæгты æнæмаст уавæр.
