Йæ цардæй ахицæн Бицъоты Барис. Уæрæсейы Журналистты цæдисы уæнг, Цæгат Ирыстоны Культурæйы сгуыхт кусæг. Цыди йыл 74 азы.
Йæ фæндаг журналистикæмæ райдыдта Цæгат Ирыстоны радиойы, уым куыста дикторæй, дарддæр сси журнал «Зори Кавказа» æмæ æндæр равдыстыты редактор. Æрмæджытæ цæттæ кодта Æппæтцæдисон радиойы программæтæн æмæ бæстæйы республикæты радиокомитеттæн. Уымæй уæлдай, Бицъоты Барис уыд хистæр уацхæссæг, уый фæстæ та «Социалистическая Осетия» (ныртæккæ «Северная Осетия») газеты бæрнон редактор. Уыцы иу рæстæг фæллой кодта телеуынынады равдыстытæ æмæ кинонывтыл.
1990-æм азты сси фыццаг республикон хæдбар газет «Ир»-ы сæйраг редактор. 1992-æмы та йæ снысан кодтой федералон службæйы разамонæг – мыхуыр хæдбардзинад хъахъхъæды Регионалон инспекций хицауæй. Фæстæдæр та — дзыллон коммуникацийы фæрæзтæ, телеуынынад, радио æмæ мыхуыры регистраци æмæ цæстдарды Регионалон управленийы разамонæгæй. Бицъоты Барис уыд телеуынынады бирæ проектты автор æмæ амонæг.
