Комсомольскæ чысыл хъæу у. Цæры дзы 1 мин 450 адæймаджы. Сæ хæлардзинад æмæ райгуырæн бынатмæ уарзондзинад хъуыстгонд у æгас республикæйыл дæр. Культурæйы хæдзары æппынæдзух концерттæ, конкурстæ, фестивальтæ. Преми «Служение» адæмы ноджы æрбангом кодта. Уæлахиз та сси сæ иумæйаг нысан. Программæйы тыххæй уайтагъд базыдтой. Æмæ 8 архайæгæн иууылдæр æххуыс кæнын райдыдтой. Æппæтуæрæсеон муниципалон преми расидтысты æртыккаг хатт. Хъæуы хицау Авлохты Валерий курдиат балæвæрдта “Алкæй хъæппæрис – иумæйаг æнтыстдзинад” номинацийы. Саккаг æй кæнынц разамынды æмæ цæрджыты æнгом архайды хуыздæр проекттæн.
Æмæ сын æнтысгæ дæр кæны. Бынаты байгом кодтой æхсæнадон хиуынаффæйады 2 хайады, æххуыс сты хъæуы райрæзтæн. Уыимæ ма Комсомольскæ æппынæдзух архайы паддзахадон программæты. Зæгъæм, “Горæты æнцонвадат уавæртæ” проекты фæлгæты саив кодтой бирæ аллейæтæ æмæ тротуартæ. Æрæджы та райстой грант скверы арæзтадæн.
Ноджы ма иу курдиат балæвæрдта Кортиаты Жаннæ. Бынæттон культурæйы хæдзары аивадон разамонæг фæсивæдæн æххуыс кæны сæ курдиæттæ раргом кæнынæн. Байгом кодтой актеры дæсныйады студи “Арвæрдын”. Сæ спектакль “Гуси Лебеди” сын республикæйы театралон цæдис банымадта хуыздæрыл. Ис сæм сылгоймæгты клуб “Хæзныдон”. Архайджытæ дæсныйадæвдисæг ахуыртæ саразынц традицион хæринæгтæ кæнынæй, кæстæрты здахынц æгъдаумæ. Нывкæнынады ахуырты дæр сывæллæттæ æнтыстджын сты.
Мæнæ ахæм ирд æмæ аив нывтæ скæнынц Кортиаты Жаннæйы хъомылгæнинæгтæ. Чызджытæй иу курдиат балæвæрдта “Территорийы райрæзт – цæрджыты фæрныгад” номинацийы. Хъуамæ цæрынæн æмæ фæллад уадзынæн скæна æмбæлгæ уавæртæ.
Архайды фæдыл документтæ исынц 22-æм ноябрьмæ. уый фæстæ райдайдзæн курдиæтты æвзæрстыты фыццаг къæпхæн. Уæлахизмæ æнхъæлмæ кæсы алы бынæттон цæрæг дæр. Комсомольскæйы стыр бинонтæй алчидæр ахуыр у иумæйагæй райгуырæн хъæуы райрæзт æмæ фæрныгадыл архайын.
