Тагъд æххуысы бригадты уаргъ дыууæ хатты фæфылдæр. Уый тыххæй фехъусын кодтой Оперативон штабы æмбырды. Дохтыртæ сæхæдæг дæр рынчын кæнынц, уыимæ сæ бынаты дæсны специалисты сæвæрын уыцы-иу рæстæг нæ рауайы.
«Æвæстиатон бастдзинад»-ы телефоны хъусынгæнинæгтæ хынцгæйæ, Битарты Вячеслав йе `ргом аздæхта цæрджыты уайдзæфтæм. Адæммæ цæуын хъæуы арæхдæр, медицинон кусæндæтты та кæд транспорт нæ фаг кæны, уæд уыцы фарстайыл дæр бакусдзыстæм, – фæнысан кодта республикæйы сæргълæууæг.
Æнæниздзинад хъахъхъæныны министрады ис медицинон кусджыты резерв. Уымæй спайда кæнын Битарты Вячеслав бафæдзæхста профилон уагдоны министры хæдивæг Цгъойты Светланæйæн.
