Коррупцийы ныхмæ координацион куысты фæдыл ныхас цыд дзуапдæттæг къамисы æмбырды. Амыдта йæ сæргълæууæг Сергей Меняйло. Æрныхас дзы кодтой Паддзахадон автоинспекцийы архайдимæ баст хъуыддæгтыл. Ведомствойы бынæттон дæлхайæдтæм æппынæдзух æрвитынц контролон-профилактикон хайады кусджыты, аразынц оперативон мадзæлттæ.
Абон хатдзæгтæ скодтой паддзахадон оргæнты кадрты службæты дæлхайæдты куыстæн. Сæйраг нысан — бæрæггæнæнты системæ сæмбырд кæнын. Уый руаджы службæтæ сæхæдæг æвзардзысты куысты хуыздæр практикæтæ. Æмбырды архайджытæ ма се ‘ргом аздæхтой Цæгат Ирыстоны æнæниздзинадхъахъхъæнынады министрады дæлбар организациты коррупцийы ныхмæ закъонад æххæсткæнынадмæ. Æрдзырдтой республикон бюджеты фæрæзтæм къазнайы цæстдарды бæрæггæнæнтыл.
