Рæстæг ивы, ивынц хъайтартæ дæр, фæлæ боксмæ цымыдисдзинад мынæг нæ кæны. Кæддæр, сывæллонæй Къудухты Виталийы дæр раззагдæр богæлтты тохтæ сразæнгард кодтой спортимæ йæ цард сбæттыныл. Ныр къорд рæстæг тырны боксы стыр æнтытстдзинæдтæм. Æрæджы дæр та Виталийы уæлахизтыл бафтыд.
Къудухты Виталий боксы хи фæлварын райдыдта сывæллон уӕвгӕйӕ. Хорз æй хъуыды кæны, дунейы раззагдæр богæлтты тохтæм куыд цымыдисæй каст, уый. Уæд йæ размæ сæвæрдта хæс, йæ цард ацы спорты хуызимæ сбæттын æмæ Ирыстоны кад бæрзонддæр кæнын.
Æрæджы дæр та Виталийы бирæ æнтыстдзинæдтæм бафтыд ноджы иу. Мæскуыйы ерысты уæззау уæзы тохы бацыдысты не`мзæххон Къудухы фырт æмæ панамæйаг Гильермо Джонс. Виталий йæ рамбылдта. Не ‘мзæххоны фæлтæрддзинад куыд рæзы, афтæ йæ хуыздæр æмбарын райдыдта, боксы мидӕг тых нæ, фæлæ сӕйрагдӕр зонд кæй у.
Виталийы фыццаг тренер Тараты Зауыр æй хорз хъуыды кæны, Виталий спорты галуаны къæсæрæй куыд æрбакъахдзæф кодта, уый. Йæ ныхæстæм гæсгæ, райдианы дæр бæрæг уыд, ацы спорты хуызы бæрзонд къæпхæнтæм кæй схиздзæн. Архайдта алыхыуызон ерысты,чысыл санчъехтæ кæнгæйæ уæлæхизмæ тырныдта. Дыууæ азы фæстæ Виталий йæхи Дзæуджыхъæумæ раивта, æмæ дарддæр йæхиуыл куыста, Тараты Зауыр ын цы бындур сæвæрдта, уый хынцгæйæ. Ныр дзы йæ хистæр ахуыргӕнӕг у сæрыстыр.
Рæстæг ивы, ивынц хъайтартæ дæр, фæлæ боксмæ цымыдисдзинад нæ мынæг кæны. Сæлбиты Алан дæр йæ хистæртимæ æнæзивæгæй уайы Елхотты спорты галуанмæ. Ныр ног уавæрты ӕмӕ æппæт гæнæнтимæ спортимæ йӕ лымæндзинад фидардæр кæндзæн. Чи зоны, фидæны ацы æвзонг лæппутæ дæр кæд 21 æнусы хъайтарты хуызæн суаиккой.
Ныр Виталий архайы йæ уарзон хъæуы кæстæрты дæр æфтауын спортыл, æнæниз царды уагыл. Амоны сын боксы сусæгдзинæдтæ.
Елхотты хъæуы сæ кæстæртæн аразынц æппæт уавæртæ, цæмæй фæсивæд спортмæ æмхиц уой.
Виталийы ног æнтыстдзинæдты тыххæй, æнæмæнг, фехъусдзыстæм. Ууыл дызæрдыг нæ кæнынц, йӕ курдиат æмæ уæлахизмæ тырнындзинад зонгæ кæмæн сты, уыдон.
