Дыргъдæтты нымæц æппынæдзух фылдæр кæнын. Ахæм нысан сæ размæ сæвæрдтой хъæууон-хæдзарадон комплекс «Де густо»-йы разамынд. Куыстуаты зайын кæнынц дыргъбæлæсты талатæ – фæткъуы, кæрдо, чылауи, бал æмæ алтъами. Уæй та сæ кæнынц æппæт Цæгат Кавказы республикæты.
Ацы быдыры фæзуат у 30 гектары. Ныртæккæ дзы садзынц талатæ. Афæдзмæ фæхъæддых уыдзысты. Æмткæй райсгæйæ ам фæнд кæнынц милуанмæ ввахс талайы айрæзын кæнын. Уæвгæ, ахæм быдыртæ куыстуат «Де густо»-йы ис 3 – сæ иумæйаг фæзуат у 90 гектары. Зилынц сæм нысангонд системæмæ гæсгæ. Быдыртæй дыууæйы куы фæархайынц, уæд æртыккаг та улæфгæ фæкæны, сагъд дзы ницы вæййы. Афтæмæй зæхх йæ æууæлтæ сног кæны.
Фæткъуы, кæрдо, чылауи, бал æмæ алтъами. Ацы бæлæсты талатæ уæй кæнынц æппæт Цæгат Кавказы республикæты. Хъæууон-хæдзарадон комплексы фæллой кæнынц 100 адæймаджы, архайд йæ тæмæны куы вæййы, уæд сæ кусджыты нымæц фæфылдæр кæнынц. Уæвгæ, «Де густо»-йы куыст районæн тынг пайда у.
Куыстуаты разамынды ныхæстæм гæсгæ ныртæккæ сæ сæйраг нысантæй иу у – дыргъдæтты нымæц фылдæр кæнын. Сæ хъуыдымæ гæсгæ, республикæйы быдырты арæхдæр цы куыст кæнынц, уымæй дыргъдæтты парахат пайдадæр у. Зæгъæм, нæ бæстæйы фæткъуытæ чи зайын кæны, ахæм куыстуæтты нымæц бирæ нæу. Афтæмæй, ацы къабазы бæстонæй архайын кæй фæнды, уыдонæн «Де густо»-йы баххуыс кæныдзысты.
Ацы хъуыддаджы фыццаг къахдзæфтæ чи кæны, уыдонæн æххуыс кæнын. Хи архайд та парахатдæр кæнын. Ацы нысантæ æххæстгæнгæйæ кусынц «Де густо»-йы специалисттæ.
Гугкаты Иринæ
