Цæхæрцæст æмæ арæхсджын. Алы лыстæгдзинадмæ дæр кæсы бæстонæй. Йæ раст архайдæй аразгæ у фæрæз куыд кусдзæн, уый. Фæстаг хæххытæ æмæ хуымæтæг гæрзтæй арæзт рухсæг цæттæ у. Дæс минуты æмгъуыд æмæ приборæй пайда кæнæн ис. Фараст аздзыд Челæхсаты Максим æппæт ацы сусæгдзинæдтæ йæхæдæг базыдта. Ахуыр кодта. Электрон гæрзтæм цымыдисдзинад æм фæзынд дыууæ азмæ хæстæг ыл куы цыд, уæд. Цы йæ сразæнгард кодта, уый дæр радзурыны аккаг у.
Уый фæстæ йæ архайд арфдæр кодта. Базонын æй фæндыд механизм мидæгæй куыд арæзт у, уый. Хæдзары ахæм дзаума нал баззад æмæ Максим кæй нæ райхæлдта,- дзуры лæппуйы мад. Цыбыр рæстæгмæ Максим æрæмбырд кодта дæсгай фæрæзтæ. Йæ ахуыргæнæг та сси интернет. Æрыгон техник æппæт зоынындзинæдтæ дæр уырдыгæй иста.
Хæдзары нæм исты дзаума куы фехæлы æмæ аразæг куы фæдзурæм, уæд йæ цурæй иуварс нал фæхизы. Тынг цымыдис ын вæййы. Бæстон æм фæкæсы, цы архайы, уымæ. Алы кусæнгарз дæр æм ис, йæхæдæг дæр арæх сцалцæг кæны сайст хæйттæ.
Максим электротехникæйы дуканитæ арæх бабæрæг кæны. Йæ æрымысгæ дзауматæм хæйттæ ам балхæны. Лæппу саст прибортæ уайтагъд сцалцæг кæны. Техникæмæ уарзондзинады тыххæй йæ рахуыдтой Электромакс. Йæ равзæрст фæндагыл æвзонг лæппу æрлæууынмæ нæ хъавы. Йæ сæйраг нысан у æнусон зилæгон скæнын. Йæ бæллиц тагъд сæххæст уыдзæн.
8 аздзыд Æлборты Аслан та йæхи иттæг хорз æнкъары Камазы шофырæй. Рог хæдтулгæ скъæрын базыдта цыппараздзыдæй. Лæппу курдиат арвыста “Лучше всех”, зæгъгæ, программæйы архайынмæ. Кæд æвзарæн къæпхæн ацæуа, уæд йæ арæхстдзинад равдисдзæн Фыццæгæм каналы.
Ныртæккæ Аслан йæхæдæг скъæры Камаз. Сæрыстыр у йæ нанайы йæхæдæг дуканимæ кæй сдавы, уымæй. Адæм ацы хъуыддаджы дыууæ дихы фесты, фæлæ йыл сахуыр сты. Æвзонг лæппуйыл æууæндынц. Лæппуйы мад куыд дзуры, афтæмæй йын фыццæгты тарст.
Ацы хъуыддаг Асланы иунæг æнтыстдзинад нæу. Лæппу иттæг хорз ахуыр кæны, йæхи фæлвары уæгъдибар хъæбысхæсты дæр. Бирæ хæттыты уыд алы ерысты уæлахидзау. Йæ стырдæр бæллиц у профессионалон спортсмен суæвын. Нæ республикæйы бирæ курдиатджын фæсивæд ис. Нæ æрмæджы хъайтартæ ма уымæн иу хатт сты æвдисæн.
