Уæрæсейы æнæмæнг медицинон фæдзæхстады фæткмæ бахастой ивддзинæдтæ. Уый тыххæй фехъусын кодтой барадон хъусынгæнинæгты официалон сайты.
Документмæ гæсгæ, низты ныхмæ профилактикон куыст поликлиникæты фæкарздæр кæндзысты. Зæгъæм, дыууæ азмæ Уæрæсейы цæрджытæ иууылдæр хъуамæ ацæуой диспансеризаци. Хроникон æгъдауæй рынчыныл кæй банымайой, уыдоны дзæбæх кæндзысты диспансерон æгъдауæй. Æдзух æм дохтыртæй уыдзæн цæстдард. Се `нæниздзинад та сын бæрæг кæндзысты афæдзмæ цалдæр хатты. Куы йæ ферох уа, уæд та йын-иу æй медицинон кусджытæ йæ зæрдыл æрлæууын кæндзысты. Кæд æмæ уыдонæн сæхицæй айрох уа, уæд хъуамæ цырд фæлæууой медицинон фæдзæхстады компаниты минæвæрттæ. Лæггæдты хæрзхъæддзинады хъæстытимæ дæр кусдзысты æнæмæнг медицинон фæдзæхстады уæнгтæ.
