Цæгат Ирыстоны цæрджытæ архайынц Æппæтуæрæсеон адæмон фронты уæнгты проекты «Карта убитых дорог», зæгъгæ, уым. Цалцæггæнинаг цы бынæттæ сты, уыдон фæбæрæг кæнынц сæ интерактивон картæйыл. Бархионтæ бабæрæг кæнынц уыцы бынæттæ æмæ уый фæстæ бæрнон кусджытæй бадомынц, цæмæй сæм базилой. Ацы хатт цавæр фарстатæм æркастысты, уый базыдта не сфæлдыстадон къорд.
Æппæтуæрæсеон адæмон фронты уæнгтæ сæ радон балц райдыдтой Кольбусы номыл уынгæй. Бынæттон цæрджытæ рагæй хъаст кæнынц, фæндаджы был цы къахвæндаг ис, уымæй. Куыд зæгъынц, афтæмæй у нарæг, иу адæймаг дæр дзы зынтæй ацæудзæн. Уый аххосæй адæм рахизынц фæндагмæ, уый та адæмы цардæн тæссаг у.
Ольга Ананиадзи, Дзæуджыхъæуы цæрæг: «Бирæ цæрджытæ фæндаджы рахиз къахвæндагæй разы не сты. Йæ иннæ фарсимæ абаргæйæ у тынг нарæг. Афæдзы размæ мын ацы фæндагыл машинæ мæ сыхаджы сцавта, тагъд та йын операци кæнын хъæудзæн».
Адæм аххосджын кæнынц, фæндаджы был цы хойрæгты дукани ис, уый. Кусы 50 азы. Раст зæгъгæйæ, дукани раздæр къаддæр уыд. Фæлæ цалдæр азы размæ йæ хицæутты бафæндыд сæ авналæнтæ фæуæрæхдæр кæнын. Къахвæндаг дзы нал уыдзæн, уый та кæй хъæуы… Уазджыты фарстæн дуканийы разамынды дзуапп радтын нæ бафæндыд. Хуыздæр уавæры нæй, Черноморскæйы уынгыл цы фæндаг цæуы, уый дæр. Адæм йæ хæрхъæддзинадæй разы не сты, у цалцæггæнинаг. Уынджы ис бирæ арæзтадон компаниты скълæдтæ. Бон-изæрмæ сæм уæзласæн хæдтулгæтæ дыууæрдæм кæнынц, æмæ фæндаг дæр, мыййаг, æфсæйнаг куы нæ у.
Къозонты виктор, фирмæ «Владикавказ»-ы техникон директор:«Ам æрбынат кодтой 14-15 организацийы. Нæ бон куыд у, афтæ фæндагмæ базилæм, бындурон цалцæгæн нæм æхца нæй. Ацæуæнтæм базилæм, фæндаг фæндаджы хуызæн скæнæм, фæлæ куыддæр рауары, афтæ та йæ уындæй зæрдæ бамæгуыр вæййы. Цъыфдзастытæ æмæ хæудтытæ»».
Æппæтуæрæсеон адæмон фронты уæнгтæ уайтагъд адæмы хъæстытæм сæ хъус æрдарынц. Проект «Карта убитых дорог», зæгъгæ, дæр хуымæтæджы нæ сарæзтой. Ныртæккæ уал дзы ис 150 фæндаджы. 50-мæ дзы базылдысты.
Таутиаты Хъазыбег, Æппæтуæрæсеон адæмон фронты регионалон хайады уæнг, проекты координатор: «Фæндæгты тыххæй нæ зæрды ис Дзæуджыхъæуы администрацийæн фехъусын кæнын. Уадз, æмæ кусой. Базилын сæм хъæуы. Мæнæ цы фæндæгты цур стæм, уыдон та, æнæмæнг, нæ проекты хай бауыдзысты».
Ахæм басгæрстытæ Æппæтуæрæсеон адæмон фронты уæнгтæ арæх саразынц. Куыд зæгъынц, афтæмæй дарддæр дæр адæмы курдиæттæм се `ргом здахдзысты. Бæрнон кусджытæ сæ куыд æххæст кæндзысты, уымæ та адæмон фронты уæнгтæ лæмбынæг кæсдзæн.
Хъуысаты Мæдинæ
