Ног азы арфæтæ

Битарты Вячеслав, стæй фæллой æмæ социалон рæзты министр Хъесаты Игорь ма абон бабæрæг кодтой ацæргæ адæймæгты хæдзар «Узæлд». Ракодтой сын бæрæгбоны арфæтæ. Республикæйы сæргълæууæг æркаст, ацæргæ адæм цы уавæрты цæрынц, уымæ. Ныртæккæ дзы ис 62 адæймаджы. Хæдзары директоры ныхæстæм гæсгæ, карджын адæмы æнкъард кæнын нæ уадзынц, арæх сын саразынц ирхæфсæн мадзæлттæ. Арæджы сын скодтой мультипликацион кинонывтæ аразынæй дæсныйад æвдисæн ахуыртæ. Абон та бæрнон уазджытæн равдыстой, ацæргæ адæм сæхæдæг кæй бацæттæ кодтой, ахæм презентаци. Куыстой йыл 2 мæйы. Битарты Вячеслав ма æркаст, ног бæстыхайы арæзтадон æмæ цалцæггæнæн куыстытæ куыд цæуынц, уымæ дæр. Куы сцæттæ уа, уæд дзы бынат уыдзæн 76 адæймагæн. Уыдзæн ма дзы медицинон хайад, 2 спортивон залы æмæ стыр зал бæрæгбоны мадзæлттæн. Æппæт куыстытыл схардз кодтой 43 млн сомы. 74 милуан сомы та ма ацы аз радих кæндзысты Пенсион фондæй.