Республикæйы Хицауады ивддзинæдтæй уал райдайдзыстæм. Людмила Башаринайы сфидар кодтой Цæгат Ирыстоны ахуырад æмæ наукæйы министрæй. Сæрмагонд указ уый фæдыл бафыста республикæйы сæргълæууæг Битарты Вячеслав. Людмила Башарина райгуырд Алагиры. Каст фæцис Цæгат Ирыстоны Паддзахадон университет. Йæ дæсныйад – историк. Йæ куысты фæндаг райдыдта ахуырады къабазы. Уæдæй-абонмæ дзы æнтыстджынæй кусы. 2000-æм азы йæ схорзæхджын кодтой Цæгат Ирыстоны “Учитель года”-йы кадджын номæй. Уымæй уæлдай ма хæссы Уæрæсейы Федерацийы ахуырады кадджын кусæджы ном дæр.
Æмæ ма иу ногдзинады тыххæй. Хозиты Барисы, “Рæстдзинад”-ы ног сæйраг редакторы абон базонгæ кодтой газеты сфæлдыстадон къордимæ. Уыцы хæс йæхимæ райста мыхуыр æмæ дзыллон коммуникациты республикон комитеты сæрдар Фидараты Юрий. Ирон дзырды фарн цы газеты хъахъхъæнынц, уый ног разамонæгæн алчидæр загъта арфæйы ныхæстæ. “Рæстдзинад”-ы хъæздыг мидварны хæзнатæ дарддæр дæр фылдæр куыд кæной, ууыл куыд кусой. Хозиты Барис уыцы-иу рæстæг йæхиуыл кæй нæ бацауæрддзæн, уымæй зæрдæ бавæрдта. Уæ зæрдыл ма уын æрдæууын кæндзыстæм уый, æмæ Хозийы-фырт ныронг куыста Цæгат Ирыстоны паддзахадон университеты ирон филологийы факультеты деканæй. У филологон наукæты кандидат, Уæрæсейы культурæйы сгуыхт архайæг, Уæрæсейы Фысджыты цæдисы уæнг. Йæ зонадон бынтæ æххæсынц журналистикæйы ахсджиаг фарстатыл дæр, стыр куыст ма бакодта литературæ иртасыны æмæ критикæйы хъуыддаджы дæр. Йæ фæллойы тыххæй йын аргъ скодтой суанг фæсарæнты дæр.
