«Ногдзау» расидт радон конкурс-æркаст. Снысан æй кодтой сылгоймæгты æппæтуденон бонмæ. Бацархайыны фадат дзы ис 16 азы онг кæуыл цæуы, уыцы сывæллæттæн. Уыдоны хъæуы, ныййарæг мады тыххæй, ныффыссын æмдзæвгæ æмæ йæ бакæсын. Æнæмæнг домæн – æмдзæвгæ хъуамæ фыст уа ирон æвзагыл. Æрбарвитын æрмæг ис журнал «Ногдзау»-ы редакцимæ, фæнысан кæнын хъæуы ном, мыггаг, кæцы къласы æмæ скъолайы ахуыр кæны сывæллон, уый дæр.
Курдиæттæ бадæттæн ис 23-æм февралы онг. Æвзæрст видеоæрмæджытæ дарддæр парахатгонд цæудзысты «Ногдзау»-ы социалон хызæгты. 6-æм мартъийы снысан кæндзысты æвзæрстытæ. Пайдагæнджытæн æмæ журнал кæсджытæ хуыздæрты равзардзысты сæхæдæг, нымадзысты æрмæгмæ цал хатты бакастысты, уый. Уæлахиздзауæн стæй саккаг кæндзысты æхсызгон лæвæрттæ. Æхцайы преми æмæ журналы лæвар рафыст æрдæг азы æмгъуыдмæ. Иннæ архайджыты схорзæхджын кæндзысты дипломтæй. Журнал «Ногдзау»-ы рауагъды редактор Сæлбиты Дианæ куыд фæбæрæг кодта, афтæмæй конкурсæн ис зынгæ ахадындзинад. Ныридæгæн видеоæрмæджытæ æрбарвыстой 30 адæймаджы.
