Цæгат Ирыстоны дарддæр æххæстгонд цæуы парти «Иугонд Уæрæсе»-йы проект «Городская среда», зæгъгæ. 4 азы дæргъы проекты руаджы бантыст саив кæнын куыд фæлладуадзæн бынæттæ, афтæ бирæфатерон хæдзæртты кæртытæ. Объекттæ равзарынц цæрджыты курдиæттæм гæсгæ. Ныртæккæ куыстытæ цæуынц Алагиры. Аразынц дзы ног фæлладуадзæн бынат.
Ног асфальт, къæйдуртæ æмæ бандæттæ. Хетæгкаты Къостайы уынджы 103 хæдзары кæрты хуыз ныр у ахæм. Цалцæггæнæн куыстытæ кæронмæ баххæст кодтой 3 къуырийы размæ. 30 азæй фылдæр йæм бæстон цæстдард нæ уыд. Кæрты ног фæлгонцыл цин кæнынц хæдзары цæрджытæ дæр. Районы администрацимæ бахастой хъæппæрис, цæмæй цалцæггонд æрцæуа.
Гнатюк Маргарита, Алагиры цæрæг: «Ацы хæдзарыл 50 азæй фылдæр цæуы. Асфальты уæлцъар та æрмæст иу хатт уыд ивд. Дондзæуæн хæтæлтæ нын куы раивтой, уæд æнæзылдæй баззад. Фарон администрацимæ курдиат бахастам. Сæвæрдтой нын ног бандæттæ. Суанг ма нæ кæрты къæвдаты рæстæг дон цæмæй ма ‘мбырд кæна, ахæм уавæртæ дæр нын сарæзтой. Тынг æхсызгон нын у».
Энергетикты кварталы 2-аг хæдзары кæрты куыстытæ кæронмæ фæхæццæ кæнынц. Зæронд уæлцъар сног кодтой. Уыимæ ма йæ сæмраст кодтой, цæмæй æвзæр боныхъæды рæстæг кæрт донæй ма дзаг кæна.
Айларты Георгий, прораб: «Абон-райсом нæ куыстытæ фæуыдзысты ацы кæрты. Ног къæйдуртæ дзы сæвæрдтам. Хъуамæ ма сæвæрæм бырондæттæ. ног æмæ бандæттæ. Уыцы иу рæстæг кусæм сыхаг 4-æм хæдзары кæрты дæр».
Ног фæлладуадзæн бынат цыбыр рæстæгмæ фæзындзæн Алагиры центры. Ныр уал кусджытæн бантыст къæйдуртæ æмæ рухсдæттæн системæйæн цæджындзытæ сæвæрын. Фæзæн йæ астæу та уыдзæн цъæх фæлыст. Фæзуаты уæлцъарыл сæвæрдзысты асфальт æмæ брусчаткæ.
Цæгæраты Георгий, куыстытæ æххæстгæнæг компанийы минæвар: «Мæй æмæ æрдæг кусæм ам. Ныртæккæ куыстытæн сæ 60 проценты баххæст кодтам. Сентябрьмæ сæ кæронмæ ахæццæ кæндзыстæм. Уæлцъар уал асфальт сæвæрнымæ цæттæ кæнæм».
Ног фæллуадуадзæн бынæттæ саразын æмæ кæртытæ сцалцæг кæнын бантыст парти «Иугонд Уæрæсе»-йы проект “Городская среда”-йы руаджы. Æххæст æй кæнынц 4 азы дæргъы. Уыцы рæстæгмæ саив кодтой 100 фæзуæтæй фылдæр республикæйы алы районты. Ацы аз куыстытæн федералон бюджетæй радих кодтой 200 милуан сомæй фылдæр. Партийы минæвæрттæ æрвылбон сæ цæст дарынц, куыстытæ куыд цæуынц, уымæ.
Едзойты Марат, парти «Иугонд Уæрæсе»-йы регионалон хайады исполкомы разамонæг: «Цæрджытимæ нæм ис бастдзинад. Сæ курдиæттæм сын не ‘ргом æппынæдзух æздахæм. Ацы аз дæр бирæ куыстытæ æххæстгонд цæуынц. Куыд Дзæуджыхъæуы, афтæ районты дæр. Абон кæсæм Алагиры цы бынæтты цæуы куыст, уыдонмæ. Кæртытæ уынут, рагæй цалцæггонд нæ уыдысты. Проектмæ сæ бахастам, цæмæй цæрджытæн æмбæлгæ уавæртæ уа сæ рæстæг æрвитынæн».
Объекттæ равзарынц цæрджыты курдиаттæм гæсгæ. 2020 азы кæронмæ проекты фæлгæты республикæйы базилдзысты 127 кæртмæ æмæ 38 æхсæнадон фæзуатмæ. Се ‘хсæн Дзæуджыхъæуы Сабырдзинады проспект æмæ Хетæгкъаты Къостайы фæз.
