Пенсиисджыты арæх асайынц цæстфæлдахджытæ. Арæхдæр сыл цы фæлитой митæ ‘рцæуы, уыдон сбæлвырд кодтой Уæрæсейы пенсион фонды кусджытæ. Цæстфæлдахджытæ сæхи бацамонынц пенсион фонды кусджытæй, пенсиисджытæм бацæуынц сæ хæдзармæ, цæмæй сбæлвырд кæной, кæм æмæ кæимæ цæрынц карджын адæм, уый.
Зæрдæ сын бавæрынц сæ пенсимæ æхца бафтауыны тыххæй, æмæ сын афтæмæй сæ банчы картæйы бæрæггæнæнтæ базонынц. Пенсион фонды кусджытæ адæмæн сæ зæрдыл лæууын кæнынц, сæ кусджытæ пенсиисджытæм хæдзармæ кæй нæ цæуынц, уый. Ома, кусынц æрмæст бынаты, кæнæ паддзахадон лæггæдты порталы ‘руаджы.
Æппæт курдиæттæ дæр пенсион фонды номæй æрвыст цæуынц почтæйæ, кæнæ та адæммæ бацæуынц Уæрæсейы пенсион фонды сæрмагонд сайты хи кабинетмæ.
