Мобилизацигонд цæрджытæн социалон æххуыс уыд радон аппаратон æмбырды ахсджиагдæр фарстаты ‘хсæн. Сæргълæууæг Сергей Меняйло бабар кодта алы бинонты уавæрмæ дæр хицæнæй кæсын. Ныхас цыд æнæниздзиныдхъахъхъæнынад æмæ ахсджиаг объектты арæзтады фарстатыл дæр. Ме ‘мкусджытæ бæлвырддæр радзурдзысты.
Мобилизацийы фарстаты фæдыл комкоммæ бастдзинады номырмæ Цæгат Ирыстоны бадзырдтой 2700 хатты. Мобилизацигонд цæрджыты фылдæр хай ныридæгæн фиддонтæ райстой. Дарддæр сын аразынц социалон паспорттæ. Сергей Меняйло бабар кодта, цæмæй алы адæймаджы уавæрмæ дæр уа хицæн æркаст.
Эпидемиологон уавæр ныртæккæ зæрдæхсаинаг нæу. Цæгат Ирыстонмæ сластой æхснырсæджы ныхмæ вакцинæйы дыккаг транш. Хостæй дарддæр ифтонг кæнынц дæрддзæф хъæутæ дæр, ныридæгæн сты 36. Ныхас ма цыд Уæллаг Фыййагдоны Пульмонологон æххуысы центры рацарæзтыл. Проектон-хыгъдон гæххæттытæ ныртæккæ сты экспертизæйы. Куыстытæ, Президенты бардзырдмæ гæсгæ, цæудзысты хæстæгдæр дыууæ азы дæргъы. Уый тыххæй фæстауæрцы фондæй нысангонд æрцыд млрд сомæй фылдæр. Республикæйы сæргълæууæг Сергей Меняйло фæнысан кодта, куыст æнæ къуылымпытæй кæй хъуамæ цæуа, уый.
Кæронмæ æрхæццæ кæны Паддзахадон адæмон ансамбль «Алан»-ы бæстыхайы рацарӕзт. Профилон министрадæй куыд фехъусын кодтой, афтæмæй куыстытæ 10 ноябрмӕ фæуыдзысты. Стадион «Спартак»-ы та ивгъуыд къуыри сæвæрдтой бетоны 500 кубометры. Дарддæр кусынц Алагиры хъармгæнæн хæтæлты рацарæзтыл дæр. Куыд ма рабæрæг, афтæмæй Рассветы донгуырæн кæронмæ арæзт фæци. 23-24 азты пъланмæ та бахастой Змейкæйы дондзæуæн системæйы цалцæг. Хъæугæ гæххæттытæ бацæттæ кæндзысты ацы азы кæронмæ.
